Ҳиндистон бош вазири Нарендра Моди Киевнинг Украина бўйича иккинчи “тинчлик саммити”ни ўтказиш таклифига ҳозирча розилик бермади. Бу ҳақда манбаларга таяниб Bloomberg хабар берди.
![](/static/2024/08/30/photo_2024-08-30_19-36-12-esJrNOz0.jpg)
Қайд этилишича, Ҳиндистон Украина ташаббусидан эҳтиёт бўлган, чунки у Россияни келишув жараёнидан четлатган. Ҳиндистон ТИВнинг Bloomberg’га таъкидлашича, “ҳозирги босқичда аниқ шартлар ва усуллар ҳақида изоҳ беришга эрта”.
Аввалроқ Украина президенти Владимир Зеленский Наренда Модига Ҳиндистонда Украина можаросини ҳал қилиш бўйича конференция ташкил этишни таклиф қилгани ҳақида хабар берилганди. Маълумотларга кўра, Украина раҳбари ўз таклифини Ҳиндистон бош вазирининг Киевга ташрифи чоғида билдирган.
23 август куни Моди Киевга бир кунлик ташрифи чоғида Зеленский билан учрашганди. Томонлар, жумладан, Россия—Украина можаросини ҳал қилиш масаласини муҳокама қилишни режалаштирган. Модининг Киевга ташрифи дастури тафсилотлари ошкор этилмаган.
Моди, шунингдек, Зеленскийга Ҳиндистон ва ўзи шахсан можарони ҳал қилишга ҳисса қўшишга тайёрлигини маълум қилган.
“Сизни ишонтириб айтаманки, Ҳиндистон тинчликка эришиш йўлида ҳисса қўшишга рози. Мен шахсан тинчликка эришиш учун дўст сифатида ҳар қандай ролни ўйнашга тайёрман”, дея Моди сўзларини келтиради Reuters нашри.
Изоҳ (0)