Kreml Financial Times’ning (FT) Moskva va Kiyev energiya obyektlariga o‘zaro hujumlarni to‘xtatish bo‘yicha muzokaralar boshlagani haqidagi xabarini yolg‘on deb atadi.
“Hozir haqiqatga hech qanday aloqasi bo‘lmagan juda ko‘p xabarlar mavjud. Hatto eng obro‘li nashrlar ham bunday xabarlar chop etilishiga ruxsat bermoqda”, deydi Rossiya prezidenti matbuot kotibi Dmitriy Peskov matbuot brifingida.
Avvalroq FT tegishli manbalarga tayanib, Ukraina va Rossiya Qatar vositachiligida energetika obyektlariga hujumlarni o‘zaro to‘xtatish bo‘yicha dastlabki muzokaralar olib borayotganini xabar qilgan edi. Unga ko‘ra, Moskva va Kiyev o‘zining razvedka xizmatlari erishgan kelishuvlar doirasida so‘nggi haftalarda bir-birining energetika infratuzilmasiga hujumlar chastotasini kamaytirgan.
“Mumkin bo‘lgan muzokaralar Ukrainaning Kursk viloyatiga hujumi tufayli avgust oyida to‘xtatilgan sa’y-harakatlarning qayta tiklanishini anglatadi”, deb yozgan FT.
Nashrning taʼkidlashicha, agar kelishuvga erishilsa, bu 2022-yil fevralidan beri mojaroning “eng katta deeskalatsiyasi” bo‘ladi.
Ukraina prezidenti Vladimir Zelenskiyning idorasi mazkur xabarga izoh bermagan. Ukraina rahbari oktyabr oyi o‘rtalarida energiya inshootlariga zarba bermaslikka chaqiruvchi kelishuv Rossiyaning yirik tinchlik muzokaralarida ishtirok etishga tayyorligidan dalolat berishini aytgan edi.
Izoh (0)