Киевдаги расмийлар НАТОга аъзо бўлиш эвазига Украина ҳудудларининг бир қисмини Россияга бериш масаласини муҳокама қилмоқда. Бу ҳақда Financial Times хабар берди.
“Киевнинг баъзи амалдорлари Россия назорати остидаги барча ҳудудларни қайтариб олиш учун шахсий таркиб, ўт очиш кучи ва Ғарб кўмагининг етишмаслигидан хавотирга тушмоқда”, дейилади мақолада.
Таъкидланишича, Россия “Украина ҳудудининг тахминан бешдан бир қисми устидан амалдаги назоратни сақлаб қолиши” ҳақидаги келишув муҳокама қилинмоқда. Ҳудудлар эвазига Киев хавфсизлик кафолатларини олишни кутмоқда. Украинанинг НАТОга аъзо бўлиши масаласи ҳам кўтарилиши мумкин.
“Келажак учун энг яхши имконият — мамлакатнинг катта қисмини сақлаб қоладиган музокаралар орқали келишувга эришишдир”, дейилади мақолада.
Яқинда НАТОнинг янги бош котиби Марк Рютте Украина альянсдан ўрин олиши кераклигини айтганди. У Вашингтондаги саммитда ваъда қилинган ёрдам пакетини амалга оширишга чақирган.
“Бу қўмондонлик тузиш, молиявий ёрдам кўрсатиш ва Украинанинг НАТОга аъзо бўлиш йўлидаги қайтариб бўлмас ҳаракатига тааллуқлидир”, деган у.
Мақолада ёзилишича, мазкур сценарий жуда оптимистик тахминларга асосланади. Улардан бири шуки, АҚШ ва унинг иттифоқчилари Киевга иттифоққа кириш учун аниқ йўл беришдан бош тортган бўлса-да, НАТОга аъзолик ёки зарур кафолатларни таклиф этишга тайёр бўлиши керак.
“Бу АҚШ ва унинг ҳамкорларидан жуда катта ва қимматга тушадиган ҳарбий кучларни жойлаштиришни талаб этади ҳамда уларни совуқ уруш давридагига ўхшаш хавфли вазиятда қолдиради”.
Иккинчи тахминга кўра, Россия президенти Владимир Путин музокараларга бориши мумкин. Аммо Украинанинг НАТОга қўшилишига тўсқинлик қилиш унинг уруш мақсадларидан бири эди. Путин ўз кучлари ҳали ҳам ютуқларини кенгайтириши мумкинлигига ишонар экан, тинчлик учун ҳудудий музокараларга рози бўлиши шубҳали.
Изоҳ (0)