Исроил ҳукумати Эроннинг 1 октябрь кунги ракета ҳужумига жавоб чоралари кўриш режасини ишлаб чиқишни якунлади, дея тегишли манбаларга таяниб CNN хабар берди.
“Эроннинг 1 октябрдаги ҳужумига Исроилнинг жавоб бериш режаси тайёр” дейилади хабарда.
Манба режа тафсилотларини ошкор қилмаган.
Эрон ташқи ишлар вазири Аббос Арақчи чоршанба куни БМТ бош котиби Антониу Гутерришга Теҳрон Исроилнинг душманона ҳаракатларига қатъий жавоб беришини маълум қилган.
“Эрон минтақада тинчлик ва хавфсизликни ҳимоя қилиш учун барча саъй-ҳаракатларини амалга ошириб, ҳужум содир этганларни пушаймон қиладиган муҳим жавобга тўлиқ тайёр”, дейди Арақчи идораси.
1 октябрь куни Ислом инқилоби қўриқчилари корпуси Исроилга кўп сонли ракеталарни учирган эди. Исроил ҳарбийлари ҳужумга ўринли бўлган вақтда жавоб беришини таъкидлаган.
- Ғарб матбуоти Исроил ўч олиш мақсадида Эроннинг нефть ва ядровий иншоотларига зарба бериши мумкинлиги ҳақида хабар берган эди.
- Washington Post манбаларига таяниб, Исроил нефть ёки ядровий объектларга эмас, Эроннинг ҳарбий объектларига зарба беришга тайёрлигини хабар қилган.
- Кан телеканали Миллий хавфсизлик бўйича маслаҳатлашувлар чоғида Исроил бош вазири Бенямин Нетаньяху ва мудофаа вазири Йоав Галант Эронга қарши эҳтимолий жавоб ҳужуми режаси ҳамда вақти бўйича келишиб олгани ҳақида хабар берган эди.
- Операцияни бошлаш учун эса Вазирлар Маҳкамасининг якуний розилиги талаб қилиниши айтилган.
Изоҳ (0)