“Ҳизбуллоҳ” 19 октябрь куни Ливандан учирган дрон Исроил бош вазири Биньямин Нетаньяхунинг Кесариядаги қароргоҳининг ётоқхона деразасига тўғри тушган. Бу ҳақда The Times of Israel хабар берди.
Исроил оммавий ахборот воситаларига дрон ётоқхона деразасига зарар етказгани ҳақидаги маълумотни эълон қилишга рухсат берилган. 19 октябрь куни “Ҳизбуллоҳ” учта дрон учирган ва уларнинг барчаси Кесариядаги қароргоҳга қаратилган. Исроил ҳарбийлари дронларнинг иккитаси уриб туширилганини хабар қилган.
22 октябрь куни “Ҳизбуллоҳ” Кейсариядаги Исроил бош вазири қароргоҳига қилинган ҳужум учун жавобгарликни расман ўз зиммасига олган. Ҳодиса оқибатида тан жароҳати олганлар йўқ. Ҳужум вақти Нетаньяху ва рафиқаси уйда бўлмаган.
Исроил бош вазири қароргоҳига ҳужум туфайли Эронга ва иттифоқчиларига таҳдид қилиб, “оғир товон тўлаш”лари ҳақида огоҳлантирган.
“Эронпараст ‘Ҳизбуллоҳ’ гуруҳининг мени ва рафиқамни ўлдиришга уриниши жиддий хато бўлди. Бу мени ёки Исроил давлатини келажагимизни таъминлаш учун душманларимизга қарши адолатли урушни давом эттиришдан тўхтата олмайди”, деган Нетаньяху.
Изоҳ (0)