Исроил бош вазири Биньямин Нетаньяхунинг Кесария шаҳридаги қароргоҳи 19 октябрь куни ҳужумга учради. Сиёсатчи Ливандан қароргоҳида учирилган дрон туфайли Эронга таҳдид қилди. Бу ҳақда Deutsche Welle хабар берди.
“Эронпараст ‘Ҳизбуллоҳ’ гуруҳининг мени ва рафиқамни ўлдиришга уриниши жиддий хато бўлди. Бу мени ёки Исроил давлатини келажагимизни таъминлаш учун душманларимизга қарши адолатли урушни давом эттиришдан тўхтата олмайди”, деди Нетаньяху.
У агар Эрон ва унинг иттифоқчилари Исроил фуқароларига зарар етказишга уринса, “оғир товон тўлашига” тўғри келишини таъкидлади. Нетаньяху Исроил “террорчиларни ва уларни юборувчиларни йўқ қилишда давом этишини” айтди.
Исроил бош вазирининг шахсий қароргоҳига дрон ҳужуми “Ҳизбуллоҳ” томонидан уюштирилди. Ҳужум пайтида Нетаньяху ва унинг рафиқаси Сара қароргоҳ ташқарисида бўлган. Ҳеч ким жароҳат олмаган.
18 октябрь куни “Ҳизбуллоҳ” Исроилга қарши урушнинг янги босқичи бошланганини эълон қилганди.
“Исроил билан қарама-қаршиликнинг янги ва кескинлашувчи босқичига ўтилишини эълон қиламиз. Бу яқин кунларда воқеалар ривожига таъсир кўрсатади”, деб ваъда берганди “Ҳизбуллоҳ”.
Изоҳ (0)