Исроил томонидан Ғазо секторида бир йилдан кўпроқ вақт давомида амалга оширилган геноцидни тўхтатиш учун халқаро ҳамжамиятнинг қўллаб-қувватлаши ва аралашуви етарли бўлмади, дея Фаластин Соғлиқни сақлаш вазирлиги маълум қилди.
У давлатларни ҳеч бўлмаганда ўлганлар учун кафан жўнатишга чақирди.
Вазирлик халқаро ҳамжамиятга оғриқли мурожаат йўллаб, Ғазодаги гуманитар инқироз, айниқса, Исроил қамаллари ва оммавий ҳужумлар давом этаётган эксклавнинг шимолий ҳудудлари ҳақида яна бир бор эслатди.
“Бизнинг даъватимиз шу: халқимизни ҳимоя қила олмаган, бошпана, озиқ-овқат ва дори-дармон билан таъминлай олмаган жаҳон ҳамжамияти ҳеч бўлмаганда шаҳидларимизнинг жасадларини ёпишимиз учун кафан жўнатишга ҳаракат қилиши керак”, дейилади вазирлик хабарида.
Исроилнинг Ғазога қуруқлик, денгиз ва ҳаводан амалга ошираётган оммавий ҳужумлари бир йилдан ортиқ вақтдан бери давом этмоқда. Бу вақт ичида 42 718 киши Исроил геноциди қурбони бўлди, 100 мингдан ортиқ киши жароҳат олди.
Минглаб ҳалок бўлганларнинг жасадлари вайроналар остида қолмоқда. Ўққа тутилган нишонлар орасида касалхоналар, ўқув бинолари ва бошқа муҳим инфратузилмалар мавжуд.
Изоҳ (0)