Вьетнам Миллий ассамблеяси генерал Луонг Куонгни мамлакатнинг янги президенти этиб сайлади. Бу ҳақда Vietnam News хабар берди.
Қайд этилишича, ассамблеянинг барча 440 аъзоси Куонг учун овоз берган.
Миллий ассамблея резолюцияни қабул қилгандан сўнг, янги президент Луонг Куонг қасамёд қилиш маросимини бошлайди. Собиқ президент То Лам Вьетнам Коммунистик партияси Марказий қўмитасининг янги бош котиби бўлди ва шу муносабат билан президентлик лавозимини тарк этди.
67 ёшли Куонг 1975 йилда ҳарбий хизматга келган. Куонг сиёсий комиссар, Армия округи бош бошқармаси бошлиғининг ўринбосари ва Вьетнам Бош сиёсий бошқармаси раиси бўлиб ишлаган.
Аввалги президентлик сайлови жорий йилнинг май ойида бўлиб ўтган эди. Ўшанда мамлакат коммунистик партияси марказий қўмитаси сиёсий бюроси аъзоси То Лам мамлакатнинг янги президенти этиб тайинланганди.
Аввалроқ Вьетнам делегацияси Қозондаги БРИКС саммитида иштирок этиши маълум бўлган эди. Вьетнамлик сиёсатшунос Чжан Диннинг фикрича, глобал жанубда ривожланаётган мамлакатларнинг роли ва мавқеини оширишга қаратилган БРИКСнинг ривожланиш йўналиши Ханой манфаатларига мос келади. Агар у ташкилотга қўшилса, Вьетнам иқтисодий соҳадаги лойиҳа ва ташаббусларда иштирок этиш орқали йирик капитал манбалари ва бозорларга кириш имкониятига эга бўлиши мумкин.
Изоҳ (0)