Вьетнам Миллий Ассамблеяси Нгуен Суан Фукни давлат раҳбари этиб сайлади. Бу ҳақда «Коммерсантъ» хабар берди.
Нгуен Суан Фук 2016 йилдан бери бош вазир сифатида фаолият юритиб келарди. Парламент вакилларининг 97,5 фоизи унинг номзодини қўллаб-қувватлади.
67 ёшли янги президент рус ва инглиз тилларини яхши билади. Ҳукумат раҳбари лавозимига тайинланишидан олдин у бош вазир ўринбосари ва ҳукумат аппарати раҳбари лавозимларида ишлаган. Бунгача у Миллий Ассамблея аъзоси бўлган.
Нгуен Суан Фук Вьетнамнинг ҳукмрон Коммунистик партияси марказий қўмитасининг бош котиби Нгуен Фу Чонгдан кейинги президент бўлди. Нгуен Фу Чонг 2016–2021 йилларда давлатни бошқариши керак бўлган президент Чанг Дай Куангнинг вафотидан кейин 2018 йилда давлат раҳбари сифатида иш бошлаган.
Шунингдек, жануби-шарқий Европанинг қисман тан олинган давлати — Косово Республикаси парламенти овоз беришнинг учинчи босқичида Вёса Османини мамлакат президенти этиб сайлади.
Associated Press маълумотларига кўра, 71 киши Османини сайлаш учун овоз берган. Косово парламенти жами 120 кишидан иборат. Икки мухолифат партия ва этник сербларнинг манфаатларини ҳимоя қилувчи партия овоз беришни бойкот қилди.
Сайловлардан олдинроқ АҚШ ва Франция элчилари депутатларни ўзаро зиддиятларни тугатиш ва янги президентни сайлаш учун овоз беришга чақирганига қарамай, парламент беш соатлик муҳокамалардан сўнг керакли 80 та овоз кворумасини тўплай олмади. 4 апрель куни кворум йиғилди, аммо овоз беришнинг биринчи ва иккинчи босқичида Османи тўплаган овоз 80 тага етмади.
Османи 2020 йилнинг ноябрида мамлакатнинг собиқ президенти Ҳошим Тачи истеъфога чиққанидан бери президент вазифасини бажариб келмоқда. Тачи ҳарбий ва инсониятга қарши жиноятлар айбловлари билан Гаага судида қатнашиш учун истеъфога чиққан эди. Тачи шу йўл билан мамлакатда «президентлик яхлитлигини ҳимоя қилиш учун» қадам ташлаётганини айтганди. Илгари Османи парламент спикери бўлиб ишлаган.
Маълумот учун, Косово Республикаси узоқ муддатли низолардан сўнг 2008 йилда Сербиядан мустақил бўлиб чиққанини эълон қилди. БМТга аъзо давлатларнинг 100 дан ортиғи охир-оқибат унинг мустақиллигини тан олди.
Аввалроқ Танзания собиқ вице-президенти Самия Сулуҳу Ҳасан мамлакат президенти сифатида қасамёд қилгани ҳақида хабар берилганди. Шу тарзда Танзания тарихида илк бор аёл киши президентлик лавозимини эгаллади. Шунингдек, январь ойида Португалия президенти Марселу Ребелу де Соуза ўз лавозимига қайта сайланган эди.
Изоҳ (0)