Россия ва Таиланд терма жамоалари ўртасидаги ўртоқлик учрашуви бекор қилинди. Бу ҳақда Россия футбол иттифоқи (РФУ) сайти хабар берди.
Ханойдаги “Ми Дин” стадионидаги учрашув 7 сентябрь куни бўлиб ўтиши керак эди. Бироқ “Яги” тўфони туфайли учрашув аввалига қолдирилди, кейин эса бекор қилинди. "Қарор юқори даражадаги ёғингарчилик миқдори ва кейинги кун учун об-ҳаво прогнозини ҳисобга олган ҳолда қабул қилинди”, дейилади РФУ баёнотида.
5 сентябрь куни Ханойда Россия терма жамоаси Вьетнам терма жамоасига қарши ўртоқлик учрашуви ўтказди. Ўйин меҳмонларнинг йирик 3:0 ҳисобидаги ғалабаси билан якунланди. Голларга ярим ҳимоячи Далер Кузяев ва ҳужумчи Тамерлан Мусаев, автоголга эса мезбонлар ҳимоячиси Ван Тан Ву муаллифлик қилди.
Маълумот учун, Россия футбол клублари ва терма жамоалари Халқаро футбол федерацияси ва Европа футбол ассоциациялари иттифоқи қарори билан халқаро турнирларда қатнашмайди. Руслар фақат ўртоқлик ўйинлари ўтказиши мумкин.
Изоҳ (0)