Вьетнамда “Яги” тўфони 200 га яқин одамнинг ҳаётига зомин бўлди

Вьетнамнинг шимолий провинциялари сўнгги йиллардаги энг даҳшатли офатлардан бири — “Яги” тўфони кўплаб қурбонлар ва вайронагарчиликларга сабаб бўлди.

Узоқ давом этган ёмғир оқибатида юзага келган кучли сув тошқини 199 кишини ҳаётдан олиб кетди. Бу ҳақда Вьетнам ахборот агентлиги маълум қилди.

Бундан ташқари, жароҳатланганлар сони 807 кишини, бедарак йўқолганлар сони эса 128 нафарни ташкил этди.

Фавқулодда хизматлар Вьетнамнинг шимолий минтақасида содир бўлган табиий офат катта моддий зарар келтирганини маълум қилди.

26 вилоят ва шаҳарда сув тошқинлари оқибатида 130 минг 268 та уй вайрон бўлган, 57 мингдан ортиқ бино сув остида қолган.

• Аввалроқ Вьетнам шимолида “Яги” тўфони оқибатида камида 14 киши ҳалок бўлгани, 180 дан ортиқ киши яралангани хабар берилганди.
• Табиий офатдан энг кўп пойтахт Ханой, Камфа, Монгкай, Хайфон, Халонг каби порт шаҳарлари, шунингдек, яқин атрофдаги Тхайбин, Хоабин ва Хинген каби шимолий провинциялар зарар кўрган.
• Бу ҳудудларда 400 дан ортиқ электр узатиш линиялари таянчларига ва 27 та электр подстанциясига шикаст етган.