Жанубий Корея президенти Юн Сок Ёл ҳукумат йиғилишида Пхеньян ўз мақсадларига эришиш учун ядро қуролидан фойдаланиши мумкинлигини айтди, деб хабар бермоқда Yonhap агентлиги.
Унинг сўзларига кўра, “ҳарбий мақсадларига эришиш учун” Шимолий Корея барча мавжуд воситаларни тўлиқ сафарбар қилади ва “ядро қуролидан фойдаланишга ҳам тайёр”.
Юн Сок Ёл уруш чиққан тақдирда, КХДР томонидан “сохта хабарлар тарқатиш ва давлатга қарши пропоганда кучларининг сафарбар этилиши” ортидан Жанубий Кореяда жиддий ижтимоий тартибсизлик ва бўлиниш юзага келиши хавфидан огоҳлантирди ва бунга қарши тайёргарлик кўришга чақирди.
У, шунингдек, атом электр станциялари, илғор саноат объектлари ва телекоммуникация тармоқларига ҳужумлар орқали Пхеньян Жанубий Кореянинг миллий инфратузилмасини фалаж қилишни ўйлаётган бўлиши мумкинлигини айтди.
Жанубий Корея президенти КХДР томонидан таҳдид кучайиши фонида Жанубий Корея, АҚШ ва Япония ўртасидаги уч томонлама ҳамкорликни мустаҳкамлаш зарурлигини таъкидлади. Яқинда Вашингтонда уч давлат етакчиларининг учрашуви бўлиб ўтганди.
Изоҳ (0)