Интизомий жазога тортилган америкалик ҳарбий июль ойида Шимолий Кореяга қочиб ўтгани ҳақида хабар берилганди. КХДР ҳукумати ҳарбийнинг ҳаракатига АҚШ армиясидаги ирқий камситиш сабаб бўлганини маълум қилди. Бу ҳақда Bild хабар берди.
Июль ойида 23 ёшли америкалик ҳарбий Тревис Кинг сайёҳлик экскурсияси давомида Жанубий ва Шимолий Корея ўртасидаги чегара чизиғини кесиб ўтган. Шундан сўнг Пхеньян ҳарбийнинг тақдири ҳақида узоқ вақт ҳеч қандай маълумот бермаган.
Янги маълумотга кўра, ҳарбийнинг “Америка жамиятидаги тенгсизлик” ва “АҚШ армиясидаги ирқий камситиш туфайли” ҳафсаласи пир бўлган. Бу уни Шимолий Кореяга қочишга мажбур қилган. Шимоли Корея ҳукуматига кўра, у қочқин сифатида қолишни хоҳлаган.
Тревис Кинг Жанубий Кореяда хизмат қилаётган пайтда қонунни бузгани учун маҳаллий қамоқхонада 50 кун ўтирган. Шундан сўнг у АҚШга олиб кетилиши керак бўлган. Бироқ Кинг яширинишга қарор қилган ва КХДРга қочиб ўтган.
Расмий равишда Шимолий Корея ва АҚШ 1953 йилдан бери уруш ҳолатида бўлгани сабабли Кинг расман ҳарбий асир сифатида тан олиниши мумкин.
Кинг беш йил ичида Шимолий Корея томонидан асирга олинган биринчи америкалик бўлди. Бунгача АҚШ фуқароси Брюс Лоуренс КХДРнинг Хитой билан чегарасини ноқонуний кесиб ўтгани учун қўлга олинганди.
Изоҳ (0)