Шимолий Корея ўз сунъий йўлдошларининг фаолиятига ҳар қандай аралашувни уруш эълон қилиш деб ҳисоблашини маълум қилди. Пхеньян ноябрь ойида биринчи разведка аппаратини орбитага муваффақиятли олиб чиққанди.
“АҚШ космик кучларининг КХДР сунъий йўлдошига нисбатан душманлик ва хавфли позициясини эътибордан четда қолдириб бўлмайди. Бу бизнинг суверенитетимизга очиқ-ойдин даъво, аниқроғи, республикамизга уруш эълон қилишдир”, — дейилади Корея марказий ахборот агентлиги томонидан чоп этилган КХДР Мудофаа вазирлиги расмий вакили баёнотида.
Пхеньян, агар АҚШ замонавий технологиялардан қурол сифатида фойдаланса ва суверен давлат ҳуқуқларига тажовуз қилса, Шимолий Корея “Америка сунъий йўлдошларининг ишини пасайтириш ёки уларни тўлиқ йўқ қилиш учун жавоб чораларини кўриб чиқишга” ваъда берди.
КХДР расмийларининг фикрича, агар АҚШ Шимолий Корея сунъий йўлдошини ҳарбий таҳдид деб ҳисоблаб, йўқ қилишга уринса, “Корея ярим ороли осмонида доимий равишда айланиб юрадиган ва мамлакатнинг асосий стратегик активларини кузатиб турадиган кўплаб Америка сунъий йўлдошлари КХДР қуролли кучлари томонидан вайрон қилинадиган биринчи нишон бўлади”.
КХДР Мудофаа вазирлиги баёноти АҚШ космик қўмондонлиги вакилининг изоҳидан сўнг янгради. Аввалроқ қўмондонлик расмийси Вашингтон Шимолий Корея сунъий йўлдошининг разведка операцияларини тўхтатиб қўйиш имкониятига эгами, деган саволга жавоб берар экан, Қўшма Штатлар турли воситалар ёрдамида душманни коинотдаги имкониятларидан маҳрум қилиши мумкинлигини айтганди.
Шимолий Корея иккита муваффақиятсиз уринишдан сўнг 21 ноябрь куни разведка сунъий йўлдошини муваффақиятли учиргани ҳақида эълон қилди. Қурилма Ер орбитасига чиқарилди. У ҳозирга қадар Жанубий Корея ва АҚШдаги объектларни тасвирга олиб, узатди.
Изоҳ (0)