Шимолий Корея янги мудофаа вазири этиб Но Кванг Чол тайинланди. Бу ҳақда Корея Марказий ахборот агентлиги (KCNA) маълум қилди.
КХДР Олий халқ мажлисининг 14-чақириқ 11-сессиясида ҳукуматда бошқа кадрлар ўзгаришлари ҳам амалга оширилди. Жумладан, қурилиш устидан давлат назорати вазири лавозимига Ли Ман Су, Фан ва техника бўйича давлат қўмитаси раиси этиб эса Ким Сон Бин тайинланди. Бунгача Шимолий Корея мудофаа идораси раҳбари Кан Сун Нам эди.
8 октябрь куни КХДР раҳбари Ким Чен Ин Шимолий Корея кучли ядро қудратига эга ҳарбий супердержава қурилишини жадаллаштириши ҳақида баёнот берди. У Корея ярим оролида стратегик мувозанатнинг бузилиши урушга олиб келишини айтди. Шу боис Пхеньян сиёсати рақибни тийиб туриш ва минтақадаги вазиятни назорат қилиш имконини берадиган қуролга эга бўлишга қаратилганини билдирди.
4 октябрь куни Ким Чен Ин КХДР ташқи ҳужумга учраган тақдирда ўз суверенитетини ҳимоя қилиш учун барча мавжуд кучлардан фойдаланишини маълум қилди.
Изоҳ (0)