Россия президенти Владимир Путиннинг Шимолий Кореяга ташрифи чоғида Ким Чен Ин унга камёб пхунсан зотли иккита овчи итни совға қилди. Бу ҳақда Корея марказий ахборот агентлиги хабар берди.
“Ким Чен Ин фахрий меҳмонлар учун Кимсусан қароргоҳи боғида президент Путинга мамлакатимизнинг миллий ит зоти бўлган кўппакларни совға қилди”, — дейилади KCNA баёнотида.
Шунингдек, Ким Чен Ин россиялик ҳамкасбини КХДРнинг олий давлат мукофоти — Ким Ир Сен ордени билан тақдирлаган. Тақдирлаш маросими 19 июнь куни Пхеньян шаҳрида бўлиб ўтган.
Орден “икки давлат ўртасидаги муносабатларни ривожлантиришда алоҳида хизматлари учун” Россия президентига “чексиз ҳурмат ва ишонч белгиси сифатида” тақдим этилган, дейилади хабарда.
Ўз навбатида, Путин шимолий кореялик ҳамкасбига янги “Aurus” машинаси, адмирал пичоқ ва чой сервисини ҳадя этган.
Владимир Путин 18—19 июнь кунлари Шимолий Кореяга амалий ташриф билан бўлди. Давлат раҳбарлари музокараларга жами 11 соатдан ортиқ вақт сарфлади. Учрашув якунлари бўйича Россия ва КХДР ўртасида ҳар томонлама стратегик шериклик тўғрисидаги битим имзоланди. Шундан сўнг Владимир Путин Вьетнамга учиб кетди.
Изоҳ (0)