Шимолий Корея етакчиси Ким Чен Ин Жанубий Кореяга қарши яна бир кескин баёнот билан чиқди. Бу чегара яқинида ўтказилган кенг кўламли артиллерия машғулотлари ва ракета синовларидан кўп ўтмай содир бўлди.
The Guardian нашрининг 16 январдаги хабарига кўра, Ким Чен Ин КХДР Олий халқ ассамблеясида нутқ сўзлаган ва унда мамлакат конституциясини ўзгартиришга чақирган. Унинг сўзларига кўра, КХДРнинг асосий қонунида Жанубий Корея “1-рақамли душман давлат” деб белгиланиши керак.
Бундан ташқари, Ким Чен Ин Шимолий ва Жанубий Кореяни тинч йўл билан бирлаштириш энди имконсизлигини маълум қилди. У Сеулни Шимолий Кореяда режимни ўзгартиришга ва “яширин бирлашишга” уринишда айблади. КХДР етакчиси Жанубий Корея билан тўғридан тўғри можародан қочмаслигини қўшимча қилди.
“Биз урушни хоҳламаймиз, лекин ундан қочиш ниятимиз ҳам йўқ”, — деди у.
Ким Чен Ин, шунингдек, Сеул ва Пхеньян ўртасидаги ҳарбий можаро содир бўладиган бўлса, бу Жанубий Корея учун ҳалокатли бўлиши ва Қўшма Штатлар учун “тасаввур қилиб бўлмайдиган мағлубият”га олиб келиши ҳақида огоҳлантирди.
Шу куни Шимолий Корея давлат матбуоти KCNA мамлакат “Ватанни тинч йўл билан бирлаштириш қўмитаси” ҳамда миллий иқтисодиёт ва халқаро туризмни ривожлантириш бўйича ҳукумат идораларини тугатаётгани ҳақида хабар берди. КХДР Олий халқ ассамблеяси “Корея Республикаси билан қайта бирлашишга ҳеч қачон эришиб бўлмайди”, деб эълон қилди.
Жанубий Корея президенти Юн Сук Ёл Ким Чен Иннинг кескин сўзларини дарҳол қоралади ва Пхеньянни Корея халқи манфаатларига зид иш тутишда айблади.
“Баъзи таҳлилчиларнинг фикрича, Шимолий Корея Жанубий Кореяни ўзининг энг катта рақиби деб белгилаш орқали келажакдаги урушда ядро қуролидан фойдаланишни оқламоқчи бўлиши мумкин”, — деб таъкидлайди The Guardian.
Шимолий ва Жанубий Корея ўртасида ҳали ҳам расмий тинчлик келишуви имзоланмаган. 1950—1953 йиллардаги Корея уруши доимий тинчлик шартномаси эмас, балки расмий сулҳ билан якунланган.
Изоҳ (0)