Фарғонада 50 сотих ерни 25 минг долларга ноқонуний сотмоқчи бўлган МЧЖ бошлиғи ушланди

«Ўзбекистон 24» телеканалида Давлат хавфсизлик хизмати томонидан жойларда ер ва кўчмас мулк объектларининг ноқонуний савдосига оид ҳолатлар фош этилганига оид лавҳа эфирга узатилди.

Маълум бўлишича, Фарғона вилоятида транспорт хизмати билан шуғулланувчи МЧЖ раҳбари риэлторлик билан шуғулланувчи МЧЖ бошлиғи ва яна икки нафар фуқаро билан келишиб, бошқа бир фуқарога қурилиш балансида бўлган 50 сотих ер майдонини 25 минг долларга сотмоқчи бўлганида ДХХ ходимлари томонидан ушланган.

Шунингдек, Давлат кадастри палатасининг Намангандаги бўлими раҳбари ва бош мутахассиси ер билан боғлиқ фирибгарлик, яъни бошқа фуқародан 6 минг доллар ва 42 миллион сўм олгани аниқланган.

Бундан ташқари, Сирдарё вилоятининг Пахтакор туманида фермер чорвачилик учун ажратилган фермер хўжалиги еридан 20 гектарини бошқа фуқаро номига ўтказишни ваъда қилиб, у бунинг учун ундан 8 минг доллар талаб қилган. Фермер сўралган пулдан 7,5 минг долларини олган вақтида ушланган.

Тошкент шаҳри Чилонзор туманида яшовчи шахс эса Янгиҳаёт туманида яшовчи фуқарога мансабдор танишлари орқали Сергели туманидан 1,2 сотих ерни олиб беришини ваъда қилиб, эвазига 12 минг доллар сўрагани аниқланган. Ушбу шахс сўралган пулдан 6 минг долларини олган вақтда ушланган.

Шунингдек, Навоий вилояти Қизилтепа туманида яшовчи фуқаро туман ҳокими қарори билан деҳқончилик учун ўз отаси номига расмийлаштирилган 50 сотих ва унинг ёнида жойлашган яна шунча ерни мансабдор танишлари орқали харидорга сотмочи бўлиб, харидордан 8 минг доллар сўраган. У сўралган пулдан 4 минг долларини олган вақтида ушланган.

Ҳозирда ушбу шахсларга нисбатан жиноят иши қўзғатилиб, тергов ҳаракатлари олиб борилмоқда.

Аввалроқ ДХХ Бўстонлиқда от спортига ажратилган 25,4 гектар ерни 1,5 миллион долларга сотмоқчи бўлган шахсни қўлга олгани, Ўзбекистонда энди ноқонуний қурилиш ва ерни ўзбошимчалик билан эгаллаш тўғрисида Telegram-бот орқали хабар бериш мумкинлиги, Бўстонлиқдаги «Бочка» дам олиш маскани ҳудудидан фуқарога 450 минг долларга ер сотмоқчи бўлган шахс ушлангани, Жиззах ва Бухорода ерларни ноқонуний равишда сотиш ҳолатлари аниқлангани ҳақида хабар берилганди.