Тошкент вилояти Бўстонлиқ туманидаги 80 сотих ерни ноқонуний равишда сотмоқчи бўлган шахс қўлга олинди, дея хабар қилмоқда ИИВ ахборот хизмати.
Қайд этилишича, 2021 йил 1 июль куни Ўзбекистон ИИВга Н.М. ариза билан мурожаат қилиб, унда С. исмли шахс юқори лавозимда ишловчи танишлари орқали Тошкент вилояти Бўстонлиқ тумани Чорбоғ қўрғони «Бочка» сув бўйича туристик ва бошқа дам олиш маскани қуриш учун мўлжалланган 80 сотих бўш ер майдонини кадастр ҳужжатларини тайёрлаб, 450 000 АҚШ долларига сотишини, бўнак сифатида 20 000 АҚШ долларини беришини талаб қилаётганлигини маълум қилиб, унга нисбатан қонуний чора кўришни сўраган.
Мазкур аризага асосан, 1 июль куни Ўзбекистон ИИВ ЖҚББ Коррупция ва иқтисодий жиноятларга қарши курашиш бошқармаси ҳамда Бош прокуратура ҳузуридаги Иқтисодий жиноятларга қарши курашиш департаменти Тошкент вилояти бошқармаси ходимлари ҳамкорлигида ўтказилган тезкор тадбир давомида Ш.С. Тошкент вилояти, Бўстонлиқ тумани, Угом олма боғи кўчаси 82-уйда жойлашган дала ҳовлида ариза муаллифидан 20 000 АҚШ долларини олган вақтда ашёвий далиллар билан ушланди.
Мазкур ҳолат юзасидан шу куни Бош прокуратура ҳузуридаги Иқтисодий жиноятларга қарши курашиш департаменти Бўстонлиқ тумани бўлими томонидан фуқаро Ш.С.га нисбатан Жиноят кодексининг 168-моддаси 4-қисми «а» банди (жуда кўп миқдорда содир этилган фирибгарлик) ва 28-, 211-моддаси 3-қисми «а» банди (пора бериш) билан жиноят иши қўзғатилиб, Жиноят процессуал кодекснинг 224-моддаси тартибида ушланган.
Жиноят иши юзасидан тергов ҳаракатлари олиб борилмоқда.
Бундан аввал Ўзбекистонда энди ноқонуний қурилиш ва ерни ўзбошимчалик билан эгаллаш тўғрисида Telegram-бот орқали хабар бериш мумкинлиги, Жиззах ва Бухорода ерларни ноқонуний равишда сотиш ҳолатлари аниқлангани ҳамда Қаршида ҳокимлик захирасида турган бўш ерни 70 млн сўмга сотмоқчи бўлган шахс ушлангани ҳақида хабар берилганди.
Изоҳ (0)