Кадастр агентлиги Тошкент шаҳар бошқармаси бошлиғи Бекзод Тошхўжаев ўзбошимчалик билан қурилган уй ва иморатлар аёвсиз бузилишидан огоҳлантирди.
Бугунги кунда кўплаб фуқаролар Қонунчилик палатаси томонидан кўриб чиқилиб, Сенатга юборилган “Ноқонуний ўзлаштириб олинган ҳамда мазкур ерларга ўзбошимчалик билан қуриб олинган объектларга нисбатан мулк ҳуқуқини эътироф этиш” тўғрисидаги қонунни кутмоқда.
Бекзод Тошхўжаевнинг билдиришича, ҳужжати йўқ уйларга кадастр ҳужжатларини қилиб бериш бошланиши ҳақидаги хабарлар тарқалганидан кейин айрим шахслар тезкорлик билан иморат қуриб олиб, “бу уйни 5-10 йил олдин қурганман, деб иддао қилсам, ҳужжатлаштириб оламан” деб ўйлаши натижасида ҳудудларда ерларни ўзбошимчалик билан эгаллаб, қурилиш қилаётганлар ҳам учрамоқда.
Аммо “Қонун чиқса, уйимга ҳужжат қилиб оламан” деб, ноқонуний қурилиш бошлаб юборганлар хато ўйлашади. Сабаби Кадастр агентлиги томонидан ерларнинг ҳолатини ўрганиш бўйича космик сёмкалар, хариталар бор. Улар ёрдамида 5-10 йил, ҳатто 20 йил ортга қайтариб текширишимиз мумкин. Бу жараёнда инсонлар фақат ўзларига моддий зарар кўришлари билан бир қаторда, жиноий жавобгар бўлишлари мумкин, — дейди Кадастр агентлиги Тошкент шаҳар бошқармаси бошлиғи.
Ерларни ўзбошимчалик билан эгаллаб олганлик, у ерга ноқонуний қурилмани амалга оширганлик учун қонунчиликда маъмурий жавобгарликдан жиноий жавобгарликкача чоралар белгиланган.
“Шунинг учун бундай тоифадаги инсонлар ҳозирги кунда ўзбошимчалик билан иморат қураётган бўлса, ўз-ўзидан тўхтатишларини ва ерни асл ҳолатига қайтаришларини сўраймиз”, — дейди Бекзод Тошхўжаев.
Унинг маълум қилишича, қабул қилиниши кутилаётган қонунда ҳозирги даврда эгаллаб олиб, қурилиш қилаётган биноларга ҳуқуқни эътироф этиш назарда тутилмаган. Аксинча ҳозирда ерларни ўзбошимчалик билан эгаллаб, ноқонуний қурилиш қилаётганлар қонунбузурлик турига кўра маъмурий ёки жиноий жавобгарликка тортилади.
Айни пайтда агентликнинг Тошкент шаҳар бошқармаси ва унинг ҳудудий бўлимларида “Долзарб 40 кунлик” доирасида ер назорати ишларини фаоллаштириш, ўзбошимчалик билан эгаллаб олинган ерларни аниқлаш ва қонун бузилиши ҳолатларига нисбатан кескин чораларни кўриш учун доимий ишчи гуруҳлари тузилиб, ўз иш фаолиятини бошлади.
Мазкур жараёнда ер назоратчи инспекторлар томонидан аниқланган ҳолатлар жойига чиққан ҳолда махсус планшетлар ёрдамида “E-yer nazorat” ахборот тизимига киритилади ва онлайн назорат қилинади. Жиноят аломатлари бор ҳолатлар, яъни суғориладиган ерларни ўзбошимчалик билан эгаллаш ва унда ноқонуний қурилиш қилиш ҳолатлари прокуратура органларига юборилмоқда.
Изоҳ (0)