Ўзбекистонда 2021 йилнинг 11 ойи давомида ер участкаларининг ўзбошимчалик билан эгаллаб олиниши ва ушбу ер участкаларида ўзбошимчалик билан иморат қурилишига оид 15 416 та қонун бузилиши ҳолатлари аниқланган. Бу ҳақда Давлат солиқ қўмитаси ҳузуридаги Кадастр агентлиги хабар берди. Гап 2496,5 гектар ернинг ноқонуний фойдаланилиши ҳақида кетмоқда.
Агентлик маълумотларига кўра, қонун бузилишларнинг асосий қисми қишлоқ хўжалигига мўлжалланган ерларда қайд этилган — 8 395 та (1 911 гектар). Ҳудудлар бўйича ерларни ўзбошимчалик билан эгаллаб олиш ҳолатлари сони:
- аҳоли пунктлари ерларда 6 331 та (487 гектар);
- саноат, транспорт, алоқа, мудофаа ва бошқа мақсадларга мўлжалланган ерларда 17 та (2 гектар);
- ўрмон фонди ерларда 31 та (3 гектар);
- сув фонди ерларда 83 та (2 гектар),
- захира ерларда 559 та (91 гектар)ни ташкил этади.
Бундан ташқари, 2 655 та (260,3 гектар) ҳолатда судларга киритилган даъво аризаларига, асосан, 496 та (26,7 гектар) ҳолатда суднинг ҳал қилув қарори (ноқонуний қурилмаларни бузиш бўйича) қабул қилинди, 2 159 та (233,6 гектар) ҳолат бўйича суд жараёни давом этмоқда.
Шунингдек, ҳуқуқбузарларга нисбатан қонуний чора кўриш учун 4 720 та (805,9 гектар) ҳолат юзасидан прокуратура органларига маълумотлар тақдим этилиб, ҳозирги кунда бартараф этиш чоралари кўрилмоқда.
Эслатиб ўтамиз, 2021 йилнинг июнида Ўзбекистон Президенти Шавкат Мирзиёев ер муносабатларини такомиллаштириш масалалари юзасидан йиғилиш ўтказганди. Ўшанда ҳоким қарори билан нодавлат секторга ер ажратиш ҳамда ерларни тўғридан-тўғри ва текинга бериш амалиёти бекор қилиниши маълум бўлганди. Июлдан бошлаб эса Ўзбекистонда ноқонуний қурилиш ва ерни ўзбошимчалик билан эгаллаш тўғрисида Telegram-бот орқали хабар бериш мумкин бўлди.
Изоҳ (0)