Тошкент вилояти Зангиота туманидаги Назарбек ҚФЙда боғча қурилиши лозим бўлган ер тадбиркорга ноқонуний бериб юборилгани аниқланди. Бу ҳақда Сенат матбуот хизмати хабар берди.
11 январь куни Сенатнинг Фан, таълим ва соғлиқни сақлаш масалалари қўмитаси раиси О.Иминов, Хотин-қизлар ва гендер тенглик масалалари қўмитаси раиси М.Қодирхонова бу борада келиб тушган мурожаатни кўриб чиқиш мақсадида Тошкент вилояти Зангиота туманидаги ҳолатни бевосита жойида ўрганган. Ушбу масалани ҳал қилиш мақсадида мутасаддилар, маҳалла, ички ишлар органлари, ҳокимият вакиллари ҳам таклиф этилган.
Ўрганиш натижасида суд қарори бўлишига қарамасдан, тадбиркорга бериб юборилган ерда қурилиш ишлари бошлангани аниқланган. Ушбу қурилиш ишлари ноқонуний деб топилиб, вақтинча тўхтатилган.
Шунингдек, бу масала тегишли тартибда қайта кўриб чиқилиши, ушбу ҳудудда мактаб ва мактабгача таълим муассасаси ташкил этилиши таъкидланган.
Эслатиб ўтамиз, ноқонуний қурилиш ва ерни ўзбошимчалик билан эгаллаш тўғрисида Telegram-бот орқали хабар бериш имкони мавжуд. Бош прокуратура томонидан ишга туширилган @YerNazoratBot хизмати орқали фуқаролар ўзлари яшайдиган ҳудудларда қишлоқ хўжалиги ва қишлоқ хўжалиги бўлмаган ерлардан фойдаланишда қонун бузилиши ҳолатлари тўғрисида тезкор хабар бериши мумкин.
Изоҳ (0)