Бухоро вилояти ҳокими Ботир Зарипов ер участкаларини ўзбошимчалик билан эгаллаш ҳамда улардан ноқонуний фойдаланиш ҳолатлари бўйича хабар берган жамоатчилик субъектларини пул мукофоти билан рағбатлантиришини маълум қилди, дея хабар берди «Дарё» мухбири.
Маълум бўлишича, вилоятда 2021 йилда Кадастр агентлигининг вилоят бошқармаси ҳамда унинг ҳудудий бўлимлари, шунингдек, маҳаллий ҳокимликлар томонидан жами 1096 та ер билан боғлиқ қонунбузилиш ҳолати аниқланган. Уларнинг 659 таси ечимини топган бўлса, 437 таси ҳозирги кунга қадар бартараф этилмаган.«Мажбурий ижро бюросининг ҳудудий бўлимлари иш юритувида бўлган шу 659 та ноқонуний қурилмаларни бартараф этиш билан боғлиқ мурожаатлар иш юритишдан тамомланган бўлса ҳам ижро ҳужжатларининг амалда ижроси таъминланмасдан қолган. Шунингдек, йирик коммуникация тармоқлари атрофида ҳамда бошқа муҳофаза зоналарида юридик ва жисмоний шахслар томонидан жами 1285 та ноқонуний бино-иншоот қурилгани аниқланган эди. Ушбу масалаларни ҳам тўлиқ бартараф этиш чоралари ҳалигача кўрилмаган», — деган Ботир Зарипов.
Вилоятда 2021 йил давомида ер муносабатлари билан боғлиқ қонунбузилишлари бўйича 37 та жиноят иши қўзғатилган. Бироқ, ҳудудларда ер участкаларидан мақсадсиз ва самарасиз фойдаланиш, ноқонуний қурилмалар қуриш ва уларни ўзбошимчалик билан эгаллаш ҳолатларига тўлиқ барҳам берилмаган. Шу боис, бундай ноқонуний хатти-ҳаракатларнинг олдини олиш мақсадида вилоят ишчи гуруҳи тузилиб, улар зиммасига суд қарорлари асосида ер участкаларида ҳамда коммуникация тармоқлари муҳофаза зоналаридаги ноқонуний қурилмаларни бартараф этиш юкланган.
«Ҳудудда ноқонуний қурилма ва ерларни ўзбошимчалик билан эгаллаб олиш ҳолатлари ихтиёрий бартараф этилмаган тақдирда уларни мажбурий тартибда бартараф этиш бўйича судларга мурожаат қилинишини ташкил этиш кучайтирилиши зарур. Суд қарорлари асосида ноқонуний қурилма ва ўзбошимчалик билан эгаллаб олинган муаммоларни бартараф этиш тўғрисидаги ижро ҳужжатларини асоссиз равишда ижросиз қайтарган, фуқарони чақириб олиб, ижро ҳаракатларини ҳар қандай кўринишда тўхтатиш чораларини кўришга ҳаракат қилган мансабдорларнинг жавобгарлиги оширилади», — деди вилоят ҳокими.
Маълум бўлишича, ер тўғрисидаги қонунбузилишларнинг олдини олиш ва уларни аниқлашда фаоллик кўрсатган шахсларнинг моддий рағбатлантирилиши хусусида вилоят раҳбари фармойиш ҳам эълон қилган.
«Бундай муаммоларни бартараф этишда жамоатчиликка суянамиз. Шу нуқтаи назардан, ер участкаларини ўзбошимчалик билан эгаллаш ва ноқонуний фойдаланиш ҳолатлари бўйича расм ва видео қайд этиш техника воситалари орқали тасдиқланган хабарлар учун жамоатчилик назорати субъектларига Ер кодексининг 84-моддасида назарда тутилган тартибда пул мукофоти берилсин, шунингдек, бу борада ижобий натижа кўрсатган ходимлар ҳам меҳнат қонунчилигига кўра, рағбатлантирилсин», — дейилади мазкур фармойишда.
«Дарё» мухбирининг аниқлик киритишича, жамоатчилик субъектлари томонидан кўплаб расм ва видеохабарлар келиб тушган. Айни пайтда уларнинг ҳаққонийлигини ўрганиш борасида вилоят ишчи гуруҳи томонидан ишлар бошлаб юборилган.
Мавзуга доир:
- Самарқандда кўп қаватли уй қуриш учун ажратилган 1 гектар ерни 500 минг долларга сотишга уринган шахслар қўлга олинди
- Сергелида ижарага берилган 2,5 гектар ерни 1,9 млн долларга расмийлаштириб беришни ваъда қилган шахс ушланди
- Самарқандда 10 гектар ерни 250 минг долларга сотмоқчи бўлган тадбиркор ушланди
Изоҳ (0)