НАТОнинг ўз ҳудудини ядровий ҳужумдан ҳимоя қилиш бўйича Steadfast Noon номли йиллик машғулотлари 14 октябрда бошланади. Бу ҳақда НАТО бош котиби Марк Рютте маълум қилди.
Унинг таъкидлашича, бу йилги машғулотларга 60 дан ортиқ самолёт жалб этилади. Машқлар Шимолий денгиз узра – Буюк Британия, Бельгия ва Нидерландия ҳаво майдонларида ўтказилади.
“Беқарор дунёда душманлар НАТО ҳар қандай таҳдидга жавоб беришга тайёр ва қодир эканлигини билишлари учун мудофаа кучимизни синаб кўришимиз ҳамда мустаҳкамлашимиз жуда муҳим”, дея тушунтирди Рютте.
Дпа агентлигига кўра, Шимолий Атлантика альянси мазкур машғулотлар Россиянинг Украинага қарши тажовузкор урушига реакция эмаслигини таъкидлаган.
Манёвр сценарийсига оид тафсилотлар очиқланмаган. Ҳарбий экспертларнинг фикрича, ҳар йили ўтказиладиган бу машғулотлар АҚШ ядро қуролини ер ости омборларидан самолётларга хавфсиз етказиб берилиши ва уларнинг ўрнатилишини синовдан ўтказади.
“Бироқ ўқув парвозлари ҳақиқий қуроллардан фойдаланмаган ҳолда амалга оширилмоқда”, дея аниқлик киритади DPA.
НАТОнинг ушбу дастури Европада жойлашган Америка ядровий қуролларини фавқулодда вазиятларда ҳамкор самолётлардан душман нишонларига ташлашни назарда тутади. Расмий тасдиқланмаган маълумотларга кўра, бундай қуроллар Италиянинг шимолида, Туркия, Бельгия, Нидерландияда, шунингдек, Германиянинг Рейнланд-Пфалз федерал штатидаги Бюхел базасида сақланади.
Изоҳ (0)