Сирдарёда ҳокимлик захирасидаги 14 гектар ерни 30 минг доллар эвазига расмийлаштириб беришга уринган ота-бола аниқланди

Сирдарё вилояти Ховос туманида ўзганинг ишончига кириб, унинг катта миқдордаги пул маблағини ўзлаштирмоқчи бўлган балиқчиликка ихтисослашган фермер хўжалиги раҳбари ҳамда унинг ўғли қўлга олинди. Бу ҳақда ДХХ матбуот хизмати «Дарё»га маълум қилди.

Маълум қилинишича, улар фермер хўжалигининг ҳозирда туман ҳокимлиги захирасига қайтарилган 14 гектар ер майдонини мансабдор танишлари орқали харидор номига расмийлаштириб бериш эвазига ундан 30 минг АҚШ доллари талаб қилиб, муқаддам 20 минг доллар олган.

ДХХнинг Сирдарё вилояти бўйича бошқармаси ходимларининг иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказган тезкор тадбирида фермер хўжалиги раҳбари қолган пулдан 9,5 минг долларни олган вақтида ушланган.

Ховос туманида кузатилган яна бир ҳолатда эса муқаддам судланган, ҳозирда қурувчилик билан шуғулланувчи фуқаро туманнинг «Чанбил» қишлоғида мебель ишлаб чиқариш заводи ва завод ишчиларига уй-жой қуриш учун ажратилган ер майдонидан 10 сотихини ваколатли танишлари орқали харидор номига уй-жой қуриш учун расмийлаштириб бериш эвазига 22,5 миллион сўм талаб қилгани аниқланган.

У сўралган пулдан аванс сифатида 15 миллион сўм олган вақтида ДХХ ва департаментнинг ҳудудий бошқармалари ходимлари томонидан ушланган.

Шунингдек, Сирдарё вилояти бюджетдан ташқари Пенсия жамғармасининг Сардоба тумани бўлими бош инспектори лавозимида ишловчи муқаддам судланган шахс 2 нафар фуқаронинг меҳнат фаолиятига эга эканлиги тўғрисида сохта ҳужжатлар тайёрлаб, уларнинг нафақа пулларини ошириб бериш эвазига 500 доллар талаб қилган. Фуқаро сўралган пулни олган вақтида ашёвий далиллар билан қўлга олинган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ ДХХ Бўстонлиқда от спортига ажратилган 25,4 гектар ерни 1,5 млн долларга сотмоқчи бўлган шахсни қўлга олгани, Ўзбекистонда энди ноқонуний қурилиш ва ерни ўзбошимчалик билан эгаллаш тўғрисида Telegram-бот орқали хабар бериш мумкинлиги, Бўстонлиқдаги «Бочка» дам олиш маскани ҳудудидан фуқарога 450 минг долларга ер сотмоқчи бўлган шахс ушлангани, Жиззах ва Бухорода ерларни ноқонуний равишда сотиш ҳолатлари аниқлангани ҳақида хабар берилганди.