Тошкент шаҳрининг Сергели туманида жойлашган кўп қаватли уйда яшовчи аҳоли вакиллари уй шароитидан шикоят қилиб, “Дарё”га мурожаат йўллади. Аҳоли ҳокимлик масъуллари ғафлат уйқисида эканини айтиб, масъулларга қилинган шикоятлар самарасиз қолаётганини таъкидламоқда. Аҳолининг ёзишича, уларни атиги 2 та муаммо: лифтларнинг ишламаслиги ва томдан чакка ўтиши қийнамоқда.
Қўйингни сот, молингни сот, қўшимчасига кредит ол ва янги қурилган “дом”лардан хонадон сотиб ол. Бу — янги мақол эмас, балки халқ оғзаки ижодиётидир. Қийинчиликлар тугайвермаса, боз устига президентимиз томонидан аҳоли турмуш тарзини яхшилаш ҳамда халқ учун қулайликлар яратиб бериш устувор вазифа сифатида илгари сурилаётган пайтда мутасаддилар томонидан ҳа деб ижроси йўқ, ёлғон ваъдалар билан алданиб келаверсанг, бундай мақоллар нарёқда турсин, достон ҳам битиб юборишинг ҳеч гап эмас экан, — дейди “Дарё” журналистига бу ҳақда мурожаат қилган аҳоли вакилларидан бири Ҳасан Абдуғаниев.
Аҳолининг маълумот беришича, ҳокимлик биносининг шундоққина биқинида жойлашган 14 қаватли уйда 114 га яқин хонадон мавжуд.
Бироқ, бу ерда яшайдиганларнинг фикри ҳеч кимга қизиқ эмас. Юртбошимиз туманга ташриф буюрмоқчи бўлса бинонинг ташқи фасади янгидан ранг-баранг бўлиб қолишини айтмаса, томи тешиқ, аммо ҳоким жанобларининг обрўси учун усти ялтироқ... деган даражага келиб қолган. Муаммонинг энг каттаси ҳокимият кейинги йилга янгисини ўрнатиб берамиз деб ваъда берилган “лифт” мана учинчи йил ўтяптики, ўша-ўша. Амаллаб, зўрға ишлаб турган лифтга 4 киши баравар кирса, ҳаво етмай қолади. Ўзингиз бир ўйлаб кўринг, лифтни кутиш ёшлар учун у қадар муаммо эмасдир, лекин кексалар ва ёш болалилар нима қилишсин? Шошилинчда тез ёрдам чақирсангизу бу “лифт” ишламай турса дардингизни кимга айтасиз?, — дейди мурожаатчи.
Қўшимча қилинишича, зўрға ишлаб турган лифт ёнидаги юк ташишга мўлжалланган лифт эса, неча йилдирки, бузуқ.
Ёғингарчиликда бино томининг умумий фойдаланиш қисмидан чакка эмас, челаклаб сув оқишини айтмай қўяқолай. Тўғри, турар жойга оид аллақандай хусусий уй-жой мулкдорлари ширкати ҳам бор ва унга фуқаролар нима учундир пул ҳам тўлаб келамиз, аммо уларнинг ҳам қорасини шу тўлов вақтида кўрамиз, холос. Жаноб Элбек Шукуров бизни эшитасизми? Уй-жой, коммунал хизмат кўрсатиш ва ободонлаштириш масалалари бўйича ўринбосарингиз Абузар Ғаниевга сўзингиз ўтадими?, — дейди аҳоли вакилларидан бири Ҳасан Абдуғаниев.
Аҳоли ҳокимга мурожаат қилар экан, бинодаги иккинчи юк ташишга мўлжалланган “лифт”ни ишлатиб берилишини сўрамоқда.
Ёзнинг жазирамасида ёш болалар ва кексалар ҳақингизга дуо қилишади. Бизнинг мурожаатимизга ҳам виждонан ёндашсангиз бу масала ҳокимият учун чикора иш эканлигини яхши биламиз. Дарвоқе, мурожаатимизга фалон эди, писмадон эди, жавобимизга қониқмасангиз (туман ҳудудида йўқ албатта) биздан юқори турувчи ташкилотларга мурожаат қилишингиз мумкин қабилидаги муносабатингиз шарт эмас. Бизга натижа керак, — дейди аҳоли вакиллари.
Изоҳ (0)