«Президент ҳам ҳудуд учун меҳмон-да». Сергели ҳокими давлат раҳбари ташрифидан аввалги тайёргарликларга изоҳ берди

Тошкент шаҳрининг Сергели тумани ҳокими Элбек Шукуров одамлар орасида юрувчи «Ҳокимлар президент келишига тайёргарлик кўради, қилинмаган ишлар қилинади, ҳамма жой тозаланади», деган гапга тўхталиб, бунга изоҳ берди. Ҳоким бу ҳақда «Дарё» нашри билан бўлган суҳбатида гапирди.

Интернетни, ижтимоий тармоқларни кўп ўқийман-да. Кўпчилик «президент келишига тайёргарлик қилиб, ҳаммаёқни тозалаб қўйишади», дейишади. Менга ҳам шу гапни айтган опага «Сизникига эртага меҳмонга борсам бўладими, дедим. Опа «бемалол келаверинг», деди. Эртага туш пайтига бораман, дедим. «Хўп, келинг», деди. Мабодо, боришимга қизингизга ёки набирангизга ҳовлини супуриб қўй, эшик тагини тозалаб қўй, бугун уйимизга меҳмон келади деб айтасизми, дедим, уйда болаларингиздан беркитган энг ширин ширинликларни стол устига қўйиб, меҳмонни кутиб оласиз, тўғрими, дедим. Опа «тўғри» деди. Президент ҳам Сергелига келса, Сергели аҳли учун меҳмон-да, дедим. Қайси туманга борса ҳам, меҳмонда, меҳмон келиши олди албатта тозалаймиз-ку, дедим. Ким келса ҳам, биз уйимизни тоза ва озод қилиб кутиб олишимиз керак-да. Бу бизнинг менталитетимиз, тарбиямиз-ку дедим, — дейди Сергели тумани ҳокими.

Хоҳлаймизми йўқми, бизнинг, давлат ташкилотлари раҳбарларининг биринчи раҳбари аслида халқ. Тўғридан-тўғри уларга бўйсуниб, улардан пул оляпмиз. Бошқарувнинг тепасида президент туриб, халққа ёқадиган ишларни бажартирмоқда. Биз ҳокимлар эса халққа маъқул ишларни бажариб, уларнинг хизматида юрибмиз. Ёки қилмаётган бўлсак, қилиб беришимиз керак, — дейди ҳоким.

Шу маҳаллаларда яшовчи аҳоли вакилларидан қилиниши керак бўлган ишларга улгурмаганим учун узр сўрайман. «Хонобод» ва «Эски Жалариқ» маҳаллаларида газ босими паст бўлгани учун, электр энергиясидаги узилишлар сабаб узр сўрайман. Бу шунчаки узр эмас, бу мени ростманасига қийнаётган масала, шунинг учун бу ҳудудларда ишловчи аҳолидан узр сўраб, 2023 йилда ҳам фаолиятимни давом эттирсам, шу камчиликларни бартараф қиламан деб ваъда бераман, — деди Сергели тумани ҳокими.

Элбек Шукуров синовли вазиятларда президентга жудаям қийинлигини айтиб, буни юракдан ҳис қилишини таъкидламоқда.

Ҳамма иш, ҳамма янгиликлар тезда рўй бермайди. Буни тан олиш керак. Ҳамма яхши натижаларга секин-асталик билан эришилади. Давлат ишида бўлмаган одамлар буни тушунмаслиги мумкин, аммо шу давлат ишидагилар жуда яхши биладики, президентга жудаям қийин. Бошқа бир ҳудудга пул бераётган пайтда бошқа бир ишдаги маблағдан олиб қолиб, ўша ҳудуд ҳам обод бўлсин деган мазмунда у ерга ҳам маблағ илинади. Шахсан мен буни юракдан ҳис қиламан ва бунинг президент учун нақадар қийинлигини биламан. Бундай пайтда одамларнинг сабри ва қўллаб-қувватлови жудаям муҳим. Сабр деганда боримиз шу демоқчимасман. Ҳаммасини қиламиз, фақат шунақа оғир вазиятларда халқ ҳам қўллаб-қувватласа, давлат раҳбарида ҳам, бизда ҳам янаям куч-қувват бўлади. Одамлар бизни руҳлантирса, барчасига эришамиз. Сергели туманидаги президент командаси билан тоғларни талқон қиламиз, фақат бизни ҳам қўллаб туришса, шу етарли, — дейди туман ҳокими.