Amnesty International инсон ҳуқуқлари ташкилоти 18 август куни Исроилни Ғазода фаластинликларга нисбатан атайин очлик сиёсати юритишда айблади. Бу ҳақда Al Arabiya хабар берди.
БМТ ва бир қатор халқаро ёрдам ташкилотлар ҳудудда очарчилик хавфи кучаяётганини огоҳлантираётган бир пайтда, Исроил Ғазо секторига гуманитар ёрдам киришини кескин чеклаб, бу айбловларни рад этиб келмоқда. Amnesty International томонидан эълон қилинган ҳисоботда кўчирилган фаластинликлар ва болаларни даволаган шифокорларнинг гувоҳликлари келтирилган. Унда айтилишича, Исроил Ғазода фаластинликларнинг соғлиғи, турмуш тарзи ва ижтимоий ҳаётини “тизимли равишда барбод қилмоқда”.
“Бу 22 ойдан бери давом этаётган режалаштирилган сиёсатнинг оқибатидир. Исроил фаластинликларни жисмонан йўқ қилишга олиб келадиган шароитларни атайлаб яратмоқда. Ғазода геноцид содир этилмоқда”, дейилади ҳисоботда.
Ташкилот вакиллари сўнгги ҳафталарда вақтинчалик лагерларда яшаётган 19 нафар кўчирилган фаластинлик ҳамда Ғазо шаҳридаги 2 та касалхонада ишлаётган шифокорлар билан суҳбат ўтказган. Исроил армияси ва Ташқи ишлар вазирлиги AFP нашрининг бу борадаги саволларига ҳозирча изоҳ бермаяпти. Шу билан бирга, Исроил Мудофаа вазирлигига қарашли COGAT бошқармаси яқинда эълон қилган баёнотида Ғазода кенг кўламли очарчилик мавжудлиги ҳақидаги даъволар рад этилган.
Amnesty International ташкилоти бундан олдин ҳам, апрель ойида, Исроилни Ғазода фаластинликларни мажбурий кўчириш орқали амалга оширилган геноцидда айблаган эди. Ўша вақтда Исроил бу даъволарни “очиқ ёлғон” деб баҳолаган.
Изоҳ (0)