Ўзбекистонда фаолият юритувчи ҳокимлар орасида энг ёш ҳоким сифатида тилга олинувчи Тошкент шаҳрининг Сергели тумани ҳокими Элбек Шукуров «Дарё» нашри билан суҳбатида айни кунда жамоатчиликни қизиқтирган кўплаб саволларга жавоб берди. У, шунингдек, «ҳокимлар пул еб кетди», деган гап қанчалик тўғрилигага, бугун аҳоли орасида боқимандалик кайфияти пайдо бўлишида ҳокимларнинг ҳам айби борлиги ҳақидаги гап-сўзларга ва Тошкент шаҳри ҳокими Жаҳонгир Ортиқхўжаев билан ишлаш қанчалик осон ёки қийинлигига аниқлик киритди.
Суҳбат аввалида Элбек Шукуров Сергели туманига раҳбар этиб тайинланганига салкам уч йил бўлганига, ўтган фурсат давомида аҳолининг яшаш шароитини яхшилаш мақсадида маҳаллаларда амалга оширган ишлари ҳақида тўхталди.
Ҳурматли президентимизнинг сўнгги икки йилда туманлардаги маҳаллаларга бевосита маблағ ажрата бошлаганликлари маҳаллаларда аҳолининг турмуш тарзи яхшиланишига олиб келмоқда. Биз турган «Мададкор» маҳалласидаги ушбу кўчада 4 та мактабда 10 минг нафардан ортиқ ўқувчи ўқийди.Туман ҳокимининг айтишича, маҳаллаларда барпо этилаётган пиёдалар йўлакчаси ва велосипед йўлаклари қурилиши аввалида шахсан ўзи бош-қош бўлиб, ҳатто ногиронлар аравачасига ўтирган ҳолда пиёдалар йўлакчасида ногиронлиги бўлган фуқароларга қандай қулайлик яратилганини, ишнинг сифатини синчиклаб текширган.300-сонли мактабда 6,5 минг нафар бола таҳсил олади. Бу мактаб республикадаги энг катта мактаблардан бири ҳисобланади. Шу билан бирга ҳудудда 2 та мактабгача таълим муассасаси бор.
Шу таълим даргоҳлари йиғиндисида ушбу кўчадан 15 минг нафар бола ўтиб-қайтади. Бундан икки ярим йил аввал, энди иш бошлаган пайтимизда мана шу кўча жуда тор ва абгор ҳолатда эди. Кўчада пиёдалар йўлакчаси йўқ эди. Фарзандини мактабга, боғчага олиб келувчи ота-оналар жудаям қийналар эди.
Бу эса бизни роса ўйлантирарди. Энг ёмони у пайтда маҳаллий бюджет маблағлари тақчиллиги бор эди. Давлат раҳбарининг айнан маҳаллаларга қаратган эътибори сабаб бугун бу кўчада алоҳида пиёдалар йўлакчаси қурилди. Велосипедлар ҳаракати учун йўлаклар барпо этилди, — дейди Сергели тумани ҳокими Элбек Шукуров.
Қурилиш бошида бирор бир камчиликни кўрсак, ўша пайтнинг ўзида бартараф қилдирдик. Ҳатто ишни бажарувчилар билан бирга керак бўлса, ногиронлик аравачасига ўтириб, ўзимиз йўлда юриб кўриб, камчиликларини кўрсатиб бордик. Одамларнинг ўзи ҳам ишимизни кўриб, билиб, ўзлари ҳам шу тартибга ўрганди, — дейди ҳоким.Ҳокимнинг айтишича, «Зийнат», «Мададакор», «Янги Сергели», «Эзгулик» ва «Соҳибқирон» маҳаллаларида 181 та кўп қаватли уй бўлиб, 2022 йилда мазкур уйларнинг фасад қисми бўялган. Ва ҳудуддаги кўп қаватли уйлар бошқаруви «Ҳаёт» номли бошқарув компанияга ўтказилган.
Кўп қаватли уйларнинг ташқи фасадини бўяш баробарида шу уйларда яшовчи аҳолининг фарзандларига имконият ва шароит яратишга ҳаракат қилдик. Эски даврда қурилган болалар майдончалари таъмирталаб аҳволга келиб, жудаям кўримсиз бўлиб қолганди.Бугунги кунга келиб эса биргина «Мададкор» маҳалласидаги кўп қаватли уйлар олдида 11 та болалар майдончаси ва ёши катталар учун спорт билан шуғулланувчи махсус жойлар қурилди. Бу албатта, аҳолига яхши кайфият улашмоқда, — дейди ҳоким.Ҳокимнинг қўшимча қилишича, тумандаги мавжуд 46 та маҳалланинг барча кўчалари таъмирланиб, аҳоли учун қулай шароит яратилган.
Ўзимиз учун алоҳида концепция ишлаб чиқиб, барча кўп қаватли уйлар олдида болалар майдончаси, спорт майдончаси, автомобиллар ва пиёдалар учун бир-бирига халал бермайдиган йўлак, автомобиллар учун турар жой бўлиши керак деган режани қўйдик ва айнан шу режа бўйича ишладик, — дейди у.
Элбек Шукуровнинг айтишича, 2022 йил Сергели тумани таркибига Тошкент вилоятининг Зангиота туманидаги 13 та маҳалла қўшиб берилган ва 2022 йилда айнан шу 13 та маҳаллани обод қилишга куч ва маблағ сарфланган.
Зангиота туманидан ҳудудимизга ўтказилган 13 та маҳаллада қилинган асфальтлаштириш ишлари яқин беш йил ичида бутун Сергели туманидаги йўллар асфальтини умумлаштирганда ҳам улардан кўп бўлса керак. Боиси, айнан шу маҳаллаларда таъмирталаб кўчалар кўплиги боис, жорий йил айнан шу 13 та маҳаллага алоҳида эътибор қаратдик, — дейди Элбек Шукуров.
Сергели ҳокимининг айтишича, жорий йил давомида ҳудудлардаги маҳаллаларда 1,5 минг дона электр устун ўрнатилган. 6 та маҳаллага замонавий бино қуриб берилган. «Мададкор» маҳалласида жойлашган ва ҳар йили битирувчиларининг 82,6 фоизи талабаликка қабул қилинувчи мактаб капитал таъмирдан чиқарилган.
Ҳоким Сергелига раҳбарлик фаолияти аввалида унга туманнинг 7 та энг оғир муаммосини санаб, уларнинг ечими билан шуғулланиши кераклиги ҳақида топшириқ берилганини, мазкур муаммоларнинг барчасига айни кунда ечим топганини, аммо ўзи кашф қилган муаммолар орасида ҳамон ечишга улгурмаганлари борлигини айтмоқда.
Биласиз, Сергели туманида сувни тозалаш иншооти бор. Шу сабаб ўша ердан бадбўй ҳид чиқади. Бу хусусида аҳолида жуда кўп шикоятлар бор эди. Бугунги кунга келиб, ҳидни камайтириш ёки умуман ҳидни йўқотишга улгурдик. Айни кунда бу борада аҳолида шикоятлар камайди. Шунингдек, Тошкент шаҳрининг қоқ марказидаги Яккасарой туманига чегарадош ҳудуддаги канализацияси бўлмаган маҳаллаларга канализация тортилди.Яна бир энг катта муаммолардан бири — Сергели туманидаги 12 йилдан бери қаровсиз ётган паркни қайта тиклаш имкони яратилди. Янги йўл қурилди, қолаверса метро келди. Хуллас, дастлаб фаолиятим бошланган пайтдаги 7 та муаммога тўлиқ ечим топдик. Аммо ўзимиз кашф қилган муаммоларнинг ҳалигача ечилмаганлари бор. Бироқ тўхтаб қолмаганмиз, — дейди ҳоким.
Сергели ҳокими сўнгги пайтларда кўпчилик тилидан янграётган ҳокимлар пул еб кетяпти деган гапга ҳам тўхталди.
Сўнгга беш йилда президентимиз шунақа тизим яратиб бердики, бюджетдан орттириб бажарилган маблағни эркин қолдик сифатида туманнинг ўзида қолдиришни йўлга қўйди. Энди ҳокимликлар ихтиёрида ҳам маблағлар пайдо бўлди. Лекин бу маблағлар сарфини ҳам шу даражада чиройли белгилаб бердиларки, қолдик маблағларни ҳам жой-жойида сарфлаш, барчасини аҳоли манфаатига йўналтиришни белгилаб берди.Бу маблағларни сарфлашда четга чиқиш имконияти йўқ. Барчаси белгиланган тартибда амалга оширилмоқда. Кўпчилик айтади, ҳокимлар пул еб кетяпти деб, ишонинг, президентимиз яратиб берган тизимда ҳокимларнинг пул еб кетиши умуман имконсиз, — дейди у.
Изоҳ (0)