Сергели тумани ҳокими Элбек Шукуров Оммавий ахборот воситаларининг доимий кузатувчиси, ижтимоий тармоқларнинг фаол фойдаланувчиси эканини айтиб, бу тизим билан ҳамкорлик қилган раҳбар муаммолар ҳақида тез хабар топишини айтмоқда. Бу ҳақда у «Дарё» нашрига берган интервьюсида гапирди.
Журналист ёки блогерлар ҳар доим ҳам ҳақ, улар доим тўғри гапиради дейиш хато. У ҳам бирор бир масалада фикрлаб, муаммони очиб бераётганида мурожаатчидаги мавжуд маълумотдан келиб чиқиб, фикр билдиради. Ёритади. Ундан кейин ҳокимият ёки давлат ташкилоти вакили билан суҳбатлашганидан сўнг унинг фикри ўзгариши ёки тўлдирилиши мумкин. Шунинг учун унинг ёритиб бўлган маълумотидан хафа бўлишнинг кераги йўқ. Шунақа пайтда биз ҳокимлар қўрқиб, кетиб кўп хатоларга йўл қўйиб қўямиз, — дейди Сергели тумани ҳокими Элбек Шукуров.
Ҳокимнинг фикрича, жамиятда, айниқса ҳокимият тизимида иккиюзламачи ходимлар кўп ва улар раҳбарнинг айнишига сабаб бўлади.
Мен ҳам имкон қадар ҳокимликдаги командамни саралаганман. Аммо ҳаммаси бўлмаса ҳам ичида бирор бир иш қилсангиз, «хўжайин зўр иш қилдингиз, зўр айтдингиз, бопладингиз, шунақа қилиш керак эди», деб Сизни мақтайдигани топилади. Сиз бу гапни бир эшитасиз, икки эшитасиз ва учинчисида шу гапга ўрганасиз. Раҳбар бунга ўргандими атрофидаги камчиликларини кўрмай қолади. Шундай пайтда кўзимизни очиб турувчи бу — ижтимоий тармоқлар. Улар бизга кўзгу бўлиб, камчилигимизни кўрсатиб туради. Сиз камчиликлар ҳақида ўқий бошлаганингизда, одамларнинг бу ҳақда Сизга ёзиш имкони яратилганида Сиз қилаётган иш ўша тўрт нафар ходимингиз мақтаганидек жуда зўрмас, хато эканини тушуна бошлайсиз, — дейди туман ҳокими.Элбек Шукуровнинг айтишича, ижтимоий тармоқлар унга одамларнинг арз-додини етказувчи асосий минбар бўлишидан ташқари ходимларига берилган топшириқ ижросини кузатувчи восита ҳамдир.
Айтайлик бирор-бир ходимингизга топшириқ бердингиз, у ўша ишни қандай бажарганини одамлар ижтимоий тармоқлар орқали ёзиб боради. Ўқиганингизда номига келиб, оқлаб-кўклаб кетди дейишган бўлса, демак ходимингиз ҳеч қандай иш бажармаган. Сиз буни ижтимоий тармоқ орқали кузатиб борсангиз ва буни ходимингиз билса, тушуниб етса, Сиз берган топшириқни янаям масъулият билан бажаради, — дейди у.Сергели тумани раҳбарининг қўшимча қилишича, бугун одамларда ҳокимият тизими бўладими ёки бирор бир ташкилотми унинг оддий ходимларига ишонч йўқолган. Ҳамма муаммосини айнан ҳокимга айтишни истайди.
Биласизми нега бундай бўлган. Президентимиз тўғри айтадилар, биз узоқ йиллар давомида одамларни эшитмай, улар билан юзма-юз учрашмай қўйдик. Ҳоким ёки бирор бир раҳбарнинг қабулига келган фуқаро оддий қоровул ёинки бирор бир ходим билан гаплашиб, қайтиб кетадиган бўлди. Шу сабаб одамлар оддий ходимларга ишонмай қўйди. Аслида фуқаро ҳокимга муаммосини айтса ҳам унинг бажарувчиси ўша оддий ходим бўлади. Ҳоким ўша топшириқни барибир қўл остидагиларга топширади ва бажартиради. Одамлар шуни билса-да, барибир ҳокимни кўрай, унга муаммойимни айтай дейди. Биз уларни шу аҳволга келтириб қўйдик. Энди бу одатни қандай йўқ қиламизки, биз одамларга ишхонангизга келмаса ҳам Сизга дардини айтиш, ёзиш имконини яратишимиз керак. Бунда эса бизга ижтимоий тармоқлар асқатади, — дейди ҳоким.Туман раҳбари ижтимоий тармоқлардаги фаоллигини, доимо жонли эфирлар ташкил қилиб туришини аксарият раҳбарлар, айнан ҳокимлар ҳам пиар деб баҳолаганини айтмоқда.
Мен охирги пайтларда деярли ижтимоий тармоқларга чиқмай қўйдим. Буни пиар деб баҳоловчилар ҳам топилди. Энг ёмони буни давлат ташкилотида ишловчилар, касбдош ҳокимлар ҳам айтиб, мана пиар қилиб юрибди деган гапларни айтишди. Тўғриси, менга пиар умуман керакмас. Мен фақат халққа яқин бўлиш учун, халққа ҳисобот бериш учун ижтимоий тармоқда фаол бўлишга уринаман, — дейди Элбек Шукуров.Ҳокимнинг тан олишича, ёшлар ташкилотидаги фаолиятида кўп гапирган бўлса, ҳокимият тизимида кўп гапириш эмас, амалий ишга ўтиш кераклигини тушуниб етган.
Мен Камолот ёшлар ташкилотида ишлаган пайтим жуда кўп интервью берганман, кўп телевидениега чиққанман. Етарли даражада танилганман. Ҳозир менга танилиш керакмас, менга пиар шартмас. Мен ҳокимият тизимига келиб, кўп гапириш эмас, амалий иш қилиш кераклигини ҳам тушунганман. Аслида ижтимоий тармоқларда фаол бўлишимдан яна бир мақсад матбуот хизматим фаолиятини ҳам жонлантириш бўлган, — дейди ҳоким.
Изоҳ (0)