Тошкент шаҳрида 500 гектардан ортиқ майдондаги уй–жойлар талабга жавоб бермайдиган ҳолатдалиги учун реновация дастурига киритилган. Бу ҳақда пойтахт ҳокими Шавкат Умурзоқов “Ўзбекистон 24” телеканалига берган интервьюсида айтиб ўтди.
Тошкент шаҳрида давлат-хусусий шериклик шартларида лойиҳаларни амалга оширишнинг соддалаштирилган тартиби, реновация лойиҳаларини амалга ошириш, “ҳаётий давр шартномаси” асосида ҳамкорлик қилиш тартиблари тасдиқланди. Шавкат Умурзоқовнинг айтишича, янги лойиҳалар юзасидан ўтказилган йиғилишда президент реновация механизми қандай бўлиши кераклигини тушунтириб, лойиҳаларни тасдиқлаб берган.
“Қурилиш ва реновациядаги муаммоларни ечиш олдимиздаги долзарб масалалардан бўлиб турибди. Кўп йиллар илгари икки қаватли бинолар, Сергели туманида вақтинчалик уйлар қурилган. Улар талабга жавоб бермайди ва хавфсизлик нуқтаи назаридан рисклари катта. Давлат бизнесга шароит яратиб бергани учун хусусий сектор уларни келгусида бемалол кўчиради, у ерларга чиройли қурилиш объектларини барпо этади. Бизда тахминан 500 гектардан ошиқ ҳудуд реновацияга тушган. Лекин аниқ механизм йўқ эди. Ҳозир бу масала ечилди. Ўйлайманки, бу хусусий секторга ишлаш учун катта имконият”, — деди ҳоким телеканалга берган интервьюсида.
Ҳокимнинг қўшимча қилишича, Тошкент шаҳрининг Янгиҳаёт туманидаги 664,5 гектар ер майдонида “Янги авлод” саноат зонаси барпо этилади.
“Бериладиган ҳар бир гектар ер майдонини ишлаб чиқарилган маҳсулотнинг қийматига боғлаймиз. Яъни ерлар ҳар бир гектарида камида 1,5 – 2 миллион долларлик маҳсулот ишлаб чиқариш шарти билан берилади. Агар саноатни шаҳар ҳудудидан олиб чиқсак, коммунал, йўл инфраструктурамизга бўлмади деганда 30 фоиз “нагрузка”ни ечиб оламиз”, —деди Шавкат Умурзоқов
Эслатиб ўтамиз, Шавкат Мирзиёев 2018 йил декабрда парламентга йўллаган мурожаатномасида реновация дастурини яъни, фойдаланиш муддати тугаб, эскириб қолган кўп қаватли уйлар ўрнида янги ва замонавий уйлар қуриш дастурини ишлаб чиқиш лозимлигини айтганди.
Изоҳ (0)