Тошкент шаҳрида «Энг яхши йўл ҳаракати хавфсизлиги хизмати ходими» танлови ўтказилади. Бу ҳақда шаҳар ҳокими Жаҳонгир Ортиқхўжаев 16 апрель куни ЙҲХХ ходимлари билан учрашувда айтган.
Шаҳар ҳокимлиги ахборот хизмати эълон қилган видеода Жаҳонгир Ортиқхўжаев ЙПХ ходимлари учун «Энг яхши йўл ҳаракати хавфсизлиги хизмати ходими» танлови ўтказилишини билдиргани тасвирланган.
«Бу танлов очиқ бўлади. Ҳайдовчиларимиз ЙҲХХ ходимларининг муомаласи, хизмат вазифасини қай даражада бажараётгани бўйича овоз беради. Ҳомийларимиз томонидан бизга 3 та машина берилди. Биринчи ўринни олган ходимга Lacetti, иккинчи ўринга Nexia, учинчи ўринга Spark берилади», — деган ҳокимлик раҳбари.
Жаҳонгир Ортиқхўжаев йиғилишда ЙПХ ходимлари учун барча зарур шароитларни яратиб бериши, фақат улар фуқаролар билан яхши муомалада бўлишлари кераклигини таъкидлаган.
«Фаолиятим давомида биринчи марта сизлар билан учрашув ўтказяпман. 3 миллион 500 минг аҳоли истиқомат қиладиган шаҳарда ДАН (ЙҲХХ —«Дарё» изоҳи.) ходимларисиз. Пойтахт ДАН ходимлари иши, одоби, хулқи, умуман ҳар томонлама бошқалардан ажралиб туриши керак. Ҳокимликда бир ойда бир марта ДАН ходимларининг қабул кунини қилайлик. Уларнинг дардини эшитайлик. Мен ҳамма шароитни яратиб беришга ҳаракат қиламан. Бу инсонларимизни кўчада турганда оиласидаги муаммони ўйламаслиги, иш пайтида фақат иш ҳақида ўйлаши, яхши кайфиятда кулиб турадиган ҳолатга, шароитга олиб келишимиз керак», — деган у.
Аввалроқ Жаҳонгир Ортиқхўжаев ЙҲХХ ходимларининг аҳоли билан, фуқароларни эса ходимлар билан қўпол муомалада бўлмасликка чақиргани хабар қилинганди. Шунингдек, ҳоким Сергели туманидаги сайёр қабулга шахмат мактаби очиш таклифи билан келган фуқарога Spark совға қилган.
Изоҳ (0)