Telegram’даги канал админи Сергели ҳокимидан таъмирталаб кўчада интервью беришни сўради. Ҳоким бунга рози бўлди, аммо админни тополмади

Telegram’даги «Компраматузб» каналида Сергели тумани ҳокими Элбек Шукуровга мурожаат йўлланиб, «Ҳурматли ҳоким, кеча юриб интервью берганингизда равон йўлдан юрган эдингиз, мана шу кўчада ҳам интервью берсангиз», дейилди. Бу чиқишга жавоб берган Элбек Шукуров жонли эфир қилиб, канал админига суҳбатга тайёрлигини, ким у билан таъмирталаб кўчада суҳбатлашмоқчи бўлса, унга алоқага чиқишини сўради. Бу ҳақда ҳоким Facebook’даги жонли эфирида гапирди.

Маълум бўлишича, Telegram мессенжеридаги «Компраматузб» каналида Сергели тумани ҳокими Элбек Шукуровга хайрли кун тиланиб, туманнинг «Хонободтепа» маҳалласи Якубова 3-тор кўчасида таъмирталаб йўллар борлиги айтилиб, ҳокимдан айнан шу кўчаларда интервью бериш сўралган.

Бу «Хонободтепа» маҳалласи. Шу кўчада интервью берсангиз, деб сўрашибди. Тўғриси, мен интервью беришим учун мендан интервью оладиган одам бўлиши керак-да, интервью оладиган одам бўлмагач, шу тарзда жонли эфир қилиб, саволларга жавоб бермоқчиман, — дейди Telegram’даги танқидий постга онлайн жавоб қилган ҳоким.

Туман ҳокими анчадан бери жонли эфир қилмаганини, куз-қиш мавсуми қийинчиликлар билан ўтаётгани, шунингдек, аҳолида кўплаб саволлар туғилиб қолгани учун яна жонли эфирларини бошлашини билдирган.

Бугун эрталаб жудаям хурсанд бўлдим. Telegram’даги «Компраматузб» канали ташаббус билан чиқиб, менга ёрдам беришга чоғланибди. Каналда туман ҳудудидаги муаммолар кўрсатилаётгани учун канал админига ташаккур изҳор қиламан. Каналда 120 минг нафарга яқин кузатувчи бор ва, ўйлайманки, бу кузатувчилар орасида сергелиликлар ҳам кўп. Шу пайтгача кўплаб оммавий ахборот воситалари билан ҳамкорлик қилиб келганмиз. Эндиликда «Компраматузб» канали билан ҳам ҳамкорлик қилиб, камчиликларни кўриб, кузатиб борсак, уни тўғрилашимиз осон бўлади. Бу менга катта ёрдам бўлади, — дейди у.

Ҳоким тумандаги маҳалланинг аҳволи ҳақида қўшимча маълумотлар ва масъуллар изоҳи керак бўлса, тайёрлигини айтиб, «Компраматузб» канали ботига жавоб юборганини, аммо канал админи у билан боғланмаганини айтмоқда.

Telegram ботларингизга ўзимнинг 24 соат ишлаб турадиган шахсий телефон рақамим, Telegram манзилларим ҳақида ахборот қолдирдим. Ҳар қандай саволга, суҳбатга ҳам тайёрлигимни билдираман. Аммо сизлардан жавоб бўлмади. Балки техник муаммолар бордир. Тан оламиз, Сергели тумани идеал туман эмас, ўзига яраша муаммолари бор. Бу мурожаатдан сўнг яна мурожаатлар кўпайиши тайин. Барча мурожаатлар жойлаб бориладиган бўлса, каналда фақат Сергели тумани ҳақида маълумотлар чиқа бошлайди. Шу сабаб қўшимча саволлар ва яна муаммолар бўлса, жавоб беришга тайёрман. Менга жавоб келмагач, жонли эфирга чиқиб, барча саволларга жавоб беришга жазм қилдим, — дейди туман ҳокими.

Элбек Шукуров Telegram’даги чиқишга жавоб берар экан, «Хонободтепа» маҳалласининг фақатгина Якубова 3-тор кўчаси эмас, аксарият кўчалари мана шунақа абгор аҳволдалигини ҳам тан олган.

Сергели туманига Тошкент вилоятидан 13 та маҳалла ўтган бўлиб, шу маҳаллаларнинг бири «Хонободтепа» маҳалласи ҳисобланди. 13 та маҳалланинг 11 тасида асфальтлаштириш ишлари олиб борилган. Кўплаб кўчалари таъмирланган. Жумладан, «Хонободтепа» маҳалласидаги кўчаларда ҳам таъмирлаш ишлари бўлган. Фақатгина сув ўтказилиши керак бўлган кўчалар асфальтлаштирилмаган, шағал тўкиб қўйилган. Сабаби аҳолининг кўпчилиги сув ўтказиш ишлари якунланганидан сўнг асфальтлаштириш лозимлигини сўраган. Шунга жавобан таъмирлаш ишлари тўхтатилган. Ўзим ҳам шу фикрдаман. Боиси сув ўтказиш ишлари бўлса, яна қазилади ва асфальт хоҳлайсизми йўқми, чўкади, бузилади. Бироқ бу кўчаларни асфальт қилиш учун ажратилган пуллар турибди. Тендер ўтказилиб, пудратчи ҳам аниқланган. Вақти-соати билан бу кўчаларни ҳам таъмирлаб, асфальтлаштириш ишларини амалга оширамиз, — дейди туман ҳокими.

Ҳоким, шунингдек, канал админига яна бир бор мурожаат қилиб, унга алоқага чиқилса, аҳоли муаммолари юборилса, аҳоли муаммоларини ечиш янаям осон бўлишини, иш тез битишини айтган.

Сиз кунига ўнлаб мурожаатни эълон қилсангиз, ахборот хизматим жавоб беришга улгурмаслиги мумкин. Шу сабаб агар алоқага чиқилмаса шу тарзда, яъни жонли эфирга чиқиб барча саволларга жавоб беришга тайёрман. Биз бундан олдин ҳам кўпчилик журналист ва блогерларнинг саволларига, бизга юборган мурожаатларига ўз вақтида жавоб бериб келганмиз, — дейди Элбек Шукуров.