Тошкент шаҳрининг Сергели туманидаги портлашдан сўнг шаҳар ҳокими Шавкат Умрзоқов ҳудуддаги мавжуд туман ҳокимларига портлашдан зарар кўрган хонадонлар ҳамда ижтимоий соҳа объектларини қисқа муддатда таъмирлаш кераклиги ҳақида топшириқ берганди. “Дарё” ижодий жамоаси шаҳар ҳокими топшириғидан сўнг, ўтган фурсат давомида “Қурувчилар” маҳалласида қандай ишлар амалга оширилгани билан қизиқиб, масъуллар ҳамда аҳолини суҳбатга тортди.
Ярим кеча уйқуда ётганимизда катта портлаш содир бўлди. Ўғлимнинг оёғига, келинимнинг юзига зарар етганди. Аллоҳга шукр, чилладаги чақалоқларимизга ҳеч нарса қилмади. Келиним ва ўғлимни тез ёрдам машинасида шифохонага олиб бориб, ёрдам кўрсатишди. Ҳозир тўрт мучамиз соғ, оёғимизда юрибмиз, — дейди суҳбатдош Клара Дўстова.
Суҳбатдош воқеа сабаб хонадон деворлари зарарланганини, эшик ва дераза ромлари ўйилиб тушганини, бугунги кунга келиб, масъуллар уй таъмирини бошлаб юборганини айтмоқда.
Дераза ва эшик ромлари зарбдан отилиб кетганди. Бирорта соғ жойи қолмаганди. Бугунги кунга келиб, таъмирлаш ишлари бошлаб юборилди. Биз яшаб турган кўп қаватли уй Яккасарой тумани ҳокимлигига топширилган экан. Ҳоким бошчилигидаги барча раҳбарлар кеча-ю кундуз шу ерда. Уйимизда таъмирлаш ишлари бошлаб юборилди. Эшик ва дераза ромлари янгиланмоқда. Давлатмиз бу даражада ғамхўрлик қилади деб кутмагандик, — дейди суҳбатдош.
Портлаш содир бўлган ҳудуддаги кўп қаватли уйларда яшовчи Саломат Сафарованинг билдиришича, портлаш овози уйни ларзага солган. Уни қўрқтиб юборган.
Гумбурлаган овоздан уйғониб кетдим. Деразадан қарасам, олов сачраяпти. Қўрққанимдан бақириб, фарзандимни қучоқлаб, эшик томонга қочдим. Эшиклар қулаб тушиб, чиқиш эшиги очилмай қолдим. Ортимдан бошқа фарзандларим югуриб келди. Жудаям қўрқиб кетдим. Амаллаб кўчага чиққач, қўрқувимиз босилди, — дейди Дилшода Авазова.
Унинг айтишича, аҳолига емак тайёрлаш учун ҳар куни қўйлар сўйилмоқда.
Бу даражада эътибор қаратилади деб кутмагандик. Ҳамма жойлар тозаланиб, уйлар таъмири бошлаб юборилди. Ёмон кайфиятда юрган қўшнимиз йўқ. Ҳар куни уч маҳал овқат беришмоқда. Уйимиздаги синган ойналарни олиб чиқиб кетиб, дераза ва эшик ойналарини, ромларини алмаштиришмоқда. Ҳар куни қўйлар сўйилиб, уч маҳал овқат беришмоқда, — дейди у.
Суҳбатдошлар яшовчи хонадонлар таъмирига бириктирилган Яккасарой тумани ҳокими Анвар Сайфутдиновнинг айтишича, ҳудудда бошлаган таъмир ишлари бугун, 29-сентябр куни якунланади.
Одатга кўра, шаҳарда бирор бир кўнгилсизлик юз берса, мавжуд 12 та туман ҳокимлари бирикиб, муаммони ечишга ҳаракат қиламиз. Яккасарой туманига 269 та хонадондан иборат 21-А уй бириктирилди. Ҳар бир хонадон эгаси билан суҳбатлашиб, тиббий ёрдам, психологик кўмак беришга ҳаракат қиляпмиз. Кўрилган талафотлар аниқланиб, 26 та хонадонда жорий ва капитал таъмир ишлари бошланди. 5 та хонадондаги аҳвол ёмонлиги учун капитал таъмирланмоқда. 21 та хонадонда эса жорий таъмир ишлари олиб борилмоқда, — дейди Яккасарой тумани ҳокими.
Ҳокимнинг аниқлаштиришича, 21-А уй хонадонларидаги 40 дан ортиқ ром янгиланмоқда. 52 нафар фуқарога тиббий ёрдам кўрсатилган. Бир нафар фуқаронинг олган тан жароҳати оғир бўлгани боис жарроҳлик амалиёти ўтказилган.
Портлашдан зарар кўрган 4 та хонадон вакилларининг болалари ёшлиги, шунингдек, хонадони бир хонали бўлгани учун дераза ойналари синиб кетиб, яшаш учун совуқлик қилиши ҳисобга олиниб, улар тумандаги меҳмонхоналарнинг бирига вақтинча яшаш учун жойлаштирилди, — дейди туман ҳокими.
Анвар Сайфутдиновнинг қўшимча қилишича, Яккасарой туманига бириктирилган ҳудудга 10 та бригада ишламоқда.
Икки кундан бери қозон қайнатганимиз йўқ. Ҳар куни уч маҳал овқат билан таъминлашяпти. Олган овқатимиз ортиб ҳам қоляпти. Сут ва қатиқ маҳсулотларигача беришмоқда. Биз бундай эътибордан жуда хурсандмиз, — дейди суҳбатдош.
Ўзини Аҳмаджон ака деб таништирган суҳбатдош портлашдан сўнг, барча зарарни ўзимиз қоплаймиз деган хаёлда юрганини, аммо бугунги кунда нафақат уй таъмири, одамларнинг уч маҳали овқати ҳам давлат маблағлари эвазига қилинаётганидан ҳайратда эканини айтмоқда.
Барчанинг бошига тушган мусибат экан. Лекин тез орада кўрмагандек бўлиб кетамиз. Биз бу даражада эътибор бўлади деб кутмагандик. Барча бундан хурсанд. Биз таъмирлаш ишларини ҳам ўзимиз қилсак керак деб ўйлагандик, ҳукумат нафақат уй таъмири, одамларга уч маҳал овқат бериб, барчага ғамхўрлик қиляпти. Барчаси учун раҳмат, — дейди Аҳмад Тўрабоев.
Изоҳ (0)