Ўзбекистон миллий жамоаси ярим ҳимоячиси Отабек Шукуров Жаҳон чемпионати 3-саралаш босқичи 3-4-тур ўйинлари доирасидаги Эрон ва БААга қарши баҳслар олдидан ўз фикрларини билдириб ўтди.
Спортчи дастлаб клубдаги фаолияти ҳақида тўхталди.
“Саудия Арабистони чемпионатини ҳамма билса керак — Осиёда энг яхши чемпионат. Футбол юлдузлари ҳам бориб, ўша ерда ўйнашмоқда. Чемпионат жуда кучли. Худога шукур, янги жамоамга бориб, мослашиб олдим. Жамоамиз янги, таркиб ҳам. Натижаларимиз ҳам тобора яхшиланяпти”.
Тажрибали ярим ҳимоячи жамоадаги кайфият ва жисмоний ҳолати ҳақида ҳам фикр билдирди.
“Миллий жамоага барча тайёр ҳолда келади. Бу ерга келиб жисмоний ҳолатни яхшилаб бўлмайди, чунки 3 кундан кейин ўйин кутади. Ҳамма ўз клубидан тайёр бўлиб келади. Жамоамизда кайфият аъло”.
Футболчи бўлажак ўйинларда бош мураббийнинг йўқлиги таъсир қилмаслигини, бу биринчи эмаслиги, бундан ташқари унинг ёрдамчилари шу ерда эканини айтди.
“Бу биринчи марта эмас. Биз бу мураббий билан 3-4 йилдан буён ишлаяпмиз, унинг қарашларини барчамиз биламиз. Бундай ҳолат бизда олдин ҳам бўлган, адашмасам буниси учинчи марта бўляпти. Ўйлайманки, мураббийнинг йўқлиги ҳеч қандай таъсир қилмайди, чунки унинг ёрдамчилари шу ерда. Футболчилар ҳам буни тўғри тушуниб турибди. Иншааллоҳ, Катанесга соғлиқ тилаб, у ўйинлардан олдин ва учрашув давомида ёрдамчилари орқали ўз кўрсатмаларини бериб боради, деб ўйлайман”, деди тажрибали футболчи Отабек Шукуров.
Маълумот учун, Ўзбекистон миллий жамоаси 10 октябрь куни Тошкентда Эронни қабул қилса, 15 октябрда БААга қарши учрашувда қатнашади. Ҳар иккала учрашув “Бунёдкор” стадионида бўлиб ўтади.
Изоҳ (0)