Сречко Катанес: “Гуруҳдаги барча баҳслар муҳим. Айниқса, биринчи ўйиндаги ғалаба катта таъсир ўтказади”

Футбол бўйича Ўзбекистон терма жамоаси Осиё Кубогидаги юришини Сурияга қарши баҳс билан бошлайди. Учрашув 13 январь куни бўлиб ўтади.

Ўйин олдидан Ўзбекистон терма жамоаси бош мураббийи Сречко Катанес ҳамда жамоа сардори Жалолиддин Машарипов иштирокида матбуот анжумани бўлиб ўтди.

Элдор Шомуродов биз учун қанчалик муҳим футболчи эканлигини яхши биласиз. Ҳар қандай терма жамоа Машарипов ва Шомуродов сингари футболчиларга эга бўлишни хоҳлайди. Жамоамизда етакчи футболчилар кўп, бироқ унинг тажрибаси бизга жуда керак эди. Мураббий сифатида айта оламанки, биз энг яхши ўйинимизни кўрсатамиз.

Гуруҳдаги барча баҳслар муҳим. Айниқса, биринчи ўйиндаги ғалаба катта таъсир ўтказади. Уни ютгандан сўнг, қолганлари осондек туюлишни бошлайди. Барча учрашувга жиддий ёндашув билан тайёргарлик кўрамиз.

Эртанги учрашувда ўз ўйинимизни кўрсатиб, ғалаба қозонишга ва яхши натижа қайд этишга ҳаракат қиламиз.

Сурияга қарши аввал ҳам иккита учрашув ўтказганман, Сурия кучли жамоа, уларга қарши ўйнаш жуда қийин. Жамоанинг кучсиз томонлари ҳам бор, улар ҳақида етарли маълумотга эгамиз. Аксарият футболчилари хорижлик, биз шунга эътибор қаратишимиз керак. Эртанги баҳсда яхши ўйин кўрсатиб, ғалаба қозонамиз.

Сречко Катанес, Ўзбекистон терма жамоаси бош мураббийи

Осиё Кубогида 2 марта иштирок этяпман. Бундан жудаям хурсандман. Ўйинларга тайёрмиз деб ўйлайман. Ўзбекистондан бизни қўллаб-қувватлаш учун мухлислар ҳам етиб келди.

2019 йилги Осиё Кубогидаги икки нафар футболчи, мен билан Шукуров ҳозир ҳам таркибдамиз. Элдор эса жароҳати сабабли қатнаша олмаяпти. Ҳозир бизда кўпроқ интизом, кўпроқ ўйин услуби ва ишонч бор деб ҳисоблайман. Аввалги таркибда катта номлар, тажриба бўлган бўлиши мумкин, ҳозир эса ўйин услуби, бирдамлик борасида ҳам ютиб кетамиз деб ўйлайман. 

Биринчи иштирокимда ҳам ёмон қатнашмаганмиз. Гуруҳдан чиққач, Австралияга қарши ўйнаганмиз. Муносиб ўйин кўрсатиб, фақат пенальтилар сериясида мағлуб бўлганмиз. Ҳозир бизда жуда яхши терма жамоа шаклланган. Буни, ҳатто, ЖЧ саралаши Эронга қарши баҳсда ҳам кўриш мумкин. Бу мусобақа футболчилар ва мухлислар учун ёрқинроқ бўлиб ўтади деб ўйлайман. Ҳозир мухлисларда ҳам бизга нисбатан ишонч бор. 

Аввал терма жамоада бир ёки икки нафар етакчи бўларди. Шунақа вақтда уларнинг ўйини ўхшамаса, бутун терманинг ўйини ўхшамасди ва ютқазиб қўярдик. Ҳозир-чи? Мени ўйиним ўхшамаса, бошқа бир футболчининг ўйини ўхшамаса, ҳамма, ҳаттоки, захирадан тушган футболчи ҳам ўйинни ўзгартира олади. Ҳозир бизда шундай терма жамоа йиғилганки, баъзида, асосий таркибдан кўра захирадаги футболчиларнинг таъсири кучлироқдек кўринади. 

Жалолиддин Машарипов, Ўзбекистон терма жамоаси сардори

Матбуот анжуманини видео шаклида бу ерда кўриш мумкин.