12 январь куни Қатар яшил майдонларида қитъа миқёсидаги йирик мусобақа – футбол бўйича Осиё Кубоги старт олди. Ушбу турнирда Ўзбекистон миллий терма жамоаси ҳам иштирок этмоқда.
Терма жамоа жой олган B гуруҳида Сурия, Ҳиндистон ва Австралия вакиллари кейинги босқич йўлланмаси учун ўзаро кураш олиб бормоқда. 13 январь куни Ўзбекистон 1-тур доирасида Сурия термасига қарши майдонга тушди, ўйин 0:0 ҳисобидаги нурсиз дуранг билан якунланди. Қуйида мазкур ўйин ҳақидаги хулосалар қисқа сатрларда тақдим этилади.
Купер имзоси
2019 йилги Осиё Кубогида Ўзбекистон миллий терма жамоаси бош мураббийи сифатида иштирок этган аргентиналик мутахассис Эктор Купер айни вақтда Сурия терма жамоасини бошқармоқда. Мутахассиснинг Ўзбекистон терма жамоасидаги фаолиятидан келиб чиқиб айтиш мумкинки, мураббий жамоа ўйинини чуқур ва тартибли ҳимоя устига қуради. Бу ҳолат сурияликларнинг майдондаги ҳаракатларида яна бир бор ўз исботини топди.
Кўпчилик Купернинг Ўзбекистон учун “кутилмаган совға” тайёрлашини кутган эди. Унинг қўл остида миллий жамоага кириб келган футболчиларнинг баъзилари ҳозирга келиб, терманинг етакчи ўйинчиларига айланган. Турган гапки, мураббий собиқ шогирдларининг маҳоратидан хабардор ва уларга қарши қандай ўйнаш кераклиги ҳақида қўл остидагиларга керакли кўрсатмалар берган. Менимча, мазкур учрашувда биз бир вақтлар воз кечган услуб ғалаба қозонди. Сурия терма жамоасининг ўйинида Купер имзоси яққол сезилди.
Аргентиналик мутахассис бизнинг футболчилардан ҳам тахминан шундай ўйнашни талаб қилганди. Аммо шуниси ҳам борки, Купер услуби ўзбек футболига барибир бегона эди. Чунки биронта клубимиз чуқур ҳимоя ва доимий прессингга ихтисослашмаган. Футболчиларимизнинг асосий устунлиги уларнинг техник маҳоратидир. Купер услуби эса том маънода жисмоний кучга таянади.
Терма жамоамиз Шомуродовсиз ўйнай олмайдими?
Элдор Шомуродовнинг “Кальяри” машғулотида олган жароҳати Катанес режаларини ўзгартириб юборгани тайин. Сурияга қарши танланган таркибнинг ўзини оқламаганини пайқаш учун эксперт бўлиш ҳам шарт эмас, ҳаммаси майдонда кўринди.
Қанотда ўзини эркинроқ ҳис қиладиган ва самаралироқ ҳаракат қиладиган Остон Ўрунов ҳужум чизиғида ўйинни бошлади. Ўрунов жорий мавсум клуб ва терма жамоада ажойиб ўйинлар ўтказгани бор гап, бироқ мураббийнинг ҳужум чизиғида соф форвардлар қолиб, вингер “фойда”сига танлов қилиши бу сафар иш бермади. Бундан олдинги бир нечта ўйинларда Шомуродовнинг ўзи билан икки ҳимоячини олиб юриши Ўруновга ҳужумда бўш зоналарнинг очилишига сабаб бўлганди. Сурия билан учрашувда эса Остон яккаланиб қолди. Натижада, биз худди бир киши камдек ўйнадик.
Шунингдек, Сурия билан ўйин терма жамоамиз етакчиларидан бири Жалолиддин Машариповнинг ҳам тўлиқ тикланиб олмаганини кўрсатиб берди. Ярим ҳимоячи Саудия клуби билан хайрлашганидан сўнг деярли 6 ой клубсиз қолишга мажбур бўлганди. Канатес унинг тажрибасига ишонишда давом этмоқда. Шу билан бирга, марказдаги яна бир етакчимиз Отабек Шукуров ҳам ўз даражасидан бир оз паст ҳаракат қилди. Яқинда клуби билан хайрлашган ярим ҳимоячининг мунтазам ўйин амалиётига эга бўлмагани барибир сезилди. Ҳимоя ва дарвоза чизиғимизга баҳо бериш учун Сурияга қарши кечган учрашув етарли эмас. Иккинчи бўлимда соф ҳужумчи Сергеев ва ёрқин ўйинлари билан РПЛни забт этаётган Аббосбек Файзуллаевнинг қўшилиши ўйинга ранг-баранглик олиб кирди. Лекин Суриянинг мустаҳкам ҳимоясини барибир ёриб ўта олмадик.
Ротация эффектини баҳолаш қийин бўлади
Иккинчи турда Катанес катта эҳтимол билан қатор ўзгаришларга қўл уради. Дастлабки турда асосий таркибда майдонга тушган ўйинчилардан бир қанчасининг захирада қолишини тахмин қилиш учун мухлисда юқорида қайд этганимиздек экспертлик даражасидаги интеллект бўлиши шартмас. Аммо бу ўзгаришларнинг қай даражада самарали бўлгани ва ўз ўрнида амалга оширилганини билиш осон бўлмайди. Боиси, Ҳиндистон ҳам асосий эътиборини ҳимояга қаратади. Ҳиндлар сафида Суриядаги каби ижрочилар йўқлиги эса фойдамизга хизмат қилиши ҳам мумкин. Шундан келиб чиқиб, 2-тур биз учун бир оз осон бўлиши кутилмоқда. Ҳар ҳолда шундан умидимиз бор. Шунда баъзи камчиликларимиз сезилмай кетар балки. Терма жамоамизнинг бор салоҳиятини эса, 3-тур ва плей-офф ўйинларида кўрамиз. Насиб этса…
Миржалол Норқобилов
Изоҳ (0)