Сречко Катанес: “Осиё Кубогида кўрсатган натижамиздан қониқиш ҳосил қилдим”

Футбол бўйича Ўзбекистон терма жамоаси Осиё Кубогининг чорак финалида Қатарга имкониятни бой бериб, мусобақани тарк этди.

Ўзбекистон терма жамоаси бош мураббийи Сречко Катанес учрашувдан сўнг матбуот анжуманида иштирок этди.

Ҳаммасини ўзингиз кўрдингиз. Бундай ўйиндан кейин ҳафсаламиз пир бўлиши турган гап. Футболчилар ўзлари кўрсатган ўйиндан фахрланишлари керак. Яхши ўйин ўтказдик. Пенальтилар серияси эса ҳар доим хавфли бўлади. Биз мусобақани тарк этдик. Бу футбол, мағлубиятни қабул қилишимиз лозим. Ўйин давомида яхши ҳаракат қилгандик. Кутилмаганда гол ўтказиб юбордик. Ҳисобни тенглаштириб олганимиздан кейин Қатар ҳеч қандай вазият ярата олмади. Турнирда ёмон иштирок этмадик. 

Ҳимояга ётиб олдик? Мен уларга ҳимояланинг деб айтибманми? Мен уларга ортга қайтиб, ҳимояланинг деганим йўқ. Дунёдаги бирор мураббий бундай демайди. Бу футболчиларга боғлиқ. Ўша вазиятдаги футболчиларнинг руҳий ҳолатига боғлиқ. Иккинчи бўлимда кўп прессинг қилдик. Футболчилар ҳам табиийки, чарчаб қолишди. Биз дурангдан қониқиб ҳаракат қилдик демаган бўлардим.

Ҳакамлар тўғрисида ҳеч нарса дея олмайман. Яхшиси, бу мавзуга тўхталмай қўя қоламан.

Ўйинда доим бошқача бўлади. Пенальтилар серияси ҳар доим хавфли бўлган. Машғулотлар жараёнида қандай пенальтини амалга оширмайлик, ҳақиқий ўйинда бари қийинроқ.

Пенальтилар серияси учун Искандеровни майдонга туширмоқчи эдик, аммо улгурмадик.

Осиё Кубогида кўрсатган натижамиздан қониқиш ҳосил қилдим. Биз яхши ўйин кўрсатдик. Шунча жароҳат ва муаммолар билан чорак финал босқичига чиққанимиз мен учун қониқарли натижа ҳисобланади. 

Тез орада мундиал саралаши. Терма жамоамиз келажагини ишонса бўладиган ёшлар бизда етарли. Улар ўсиб келишмоқда. Ушбу мусобақада ҳам ёш футболчилар яхши ҳаракат қилишди. Март ойида ФИФА кунлари бўлади. Ушбу ўйинларга тайёргарлик кўрамиз. Мусобақадаги иштирокимиз ёмон чиққани йўқ. Мавжуд имкониятлардан яхши натижа қайд этдик деб ўйлайман. Кимдир қониқмаган бўлса, бу уларнинг муаммоси. Масалан, биринчи ўйинда Сурия билан дуранг қайд этганимизда кўпчилик бизни танқид қилди. Ўзбекистонлик журналистлар ёки яна бошқа шахслар Суриядан осон рақиб ясаб қўйишганди. Биз дурангдан қониқмагандик. Сурия терма жамоаси эса Эрон билан қандай ўйин кўрсатганини барча кўрди. Эронликлар фақатгина пенальтилар сериясидагина ғалаба қозона олишди.

Сречко Катанес, Ўзбекистон терма жамоаси бош мураббийи