Сречко Катанес: “Агар учинчи марта соғлигим сабаб терма жамоани тарк этсам, қайтиб келмайман”

Ўзбекистон миллий терма жамоаси бош мураббийи Сречко Катанес ЖЧ—2026 саралашидан ўрин олган Туркманистон билан ўйин олдидан ўз фикрларини билдирди.

“Бу ўйинга футболчилар турли жисмоний ҳолатда келган. Шунга қарамай биз мухлисларни ҳурсанд қилишга ҳаракат қиламиз.

Ротация борасида

Ҳозир сизга айтишим мумкинки, ҳеч қандай жиддий ўзгаришлар бўлмайди. Агар сиз таркибга янги футболчи қўшмоқчи бўлсангиз, сиз жамоанинг ўйинини қайта тузиб чиқишингизга тўғри келади. Бу вақт талаб этади. Ўйинни асосий таркиб бошлайди ва натижадан келиб чиқиб ёш ўйинчиларга имкон беришимиз мумкин. Бизда баъзи футболчилар охирги ўйинини 20 май куни ўтказган, бундай ўйинчиларга ҳам ўйин бошидан имконият бериш хато бўлади. Биз бу ўйинни жиддий қабул қилишимиз зарур, футболчилардан ҳам шуни сўраб қоламан. 

Асосий таркиб футболчилари ҳам март ойидан бери ўйнагани йўқ, шунинг учун уларга кўпроқ ўйин амалиёти бериш керак. 

Рақобат ҳақида

Терма жамоанинг тажрибали ўйинчилари Шомуродов, Машарипов ва уларнинг ёнидаги ёш футболчилар терма жамоани Жаҳон чемпионатига олиб чиқиши мумкин. Шуни айтиш керакки, бизнинг жамоамизни ҳурмат қилади. Эртанги ўйинда янги футболчиларни туширишимиз мумкин, лекин кейинги босқичда яна ўзимизнинг тажрибали футболчилари хизматидан фойдаланмоқчи бўлсак, бундан бизга қандай фойда? 

Футболчилар ўртасида рақобат бўлишини, бир-бирини рақобатчи деб ҳисоблашини хоҳламайман. Улар доим жамоадошига кўмаклашишини хоҳлайман. 

Саломатлиги ҳақида

Менинг руҳий ва жисмоний ҳолатим эмас, футболчиларнинг саломатлиги аҳамиятли бўлиши керак. Соғлигим ҳақида гапирсам, анча вақт кетиб қолади. Танамда бўладиган ўзгаришларга вақтида эътибор бермаганман. Футболчилар билан бу ҳақда суҳбатлашдим. Агар учинчи марта соғлигим сабаб термани тарк этсам, бошқа қайтиб келмайман. 

Олимпия термаси ҳақида

Олимпия терма жамоасини доим кузатаман. Аввало, уларни Олимпиада йўлланмаси билан табриклайман. Энг муҳими, улар камтарлигича қолиши керак. Уларда доим ишонч бўлиши зарур. Биз Жаҳон чемпионатига чиқишимизга шубҳаланмаслигимиз зарур. Мухлисларнинг қўллови, ишончини футболчилар ҳис қилади. Шу сабаб ҳаммамиз бирлашишимиз зарур. 

Суперлига ҳақида

Ҳатто четда туриб ҳам ўйинларни кузатаман. Ҳозирда бу муаммо эмас. Мен вилоятларга бориб ўйинларни кузатишим бирор нарсани ўзгартиради деб ўйламайман, аммо менинг ёрдамчиларим доим кузатиб боради”, — дейди бош мураббий. 

Ўзбекистон миллий терма жамоаси ҳисобида 10 очко мавжуд ва улар кейинги босқич масаласини муддатидан олдин ҳал қилган, Туркманистон терма жамоаси учинчи ўрин учун кураш олиб бормоқда. Улар ҳисобида бир очко бор.

Маълумот учун, Ўзбекистон  ва Туркманистон ўртасидаги баҳс эртага, 6 июнь куни бўлиб ўтади ва Тошкент вақти билан 19:30да бошланади.