Қозоғистонда 19 март куни парламентнинг қуйи палатаси Мажлис ҳамда маҳаллий кенгаш маслиҳат депутатлигига навбатдан ташқари сайлов ўтказилди. Tengrinews нашри мазкур жараёнга қанча пул сарфлангани ҳақида маълумот берди.
2022 йил 5 июнь куни Қозоғистон тарихида биринчи марта умумхалқ референдуми орқали Конститусияга ўзгартиришлар киритилди. Референдум ўтказиш учун республика бюджетидан 16 миллиард 460 миллион тенге (35 442 674 доллар) ажратилди. Референдум учун пул ҳукумат захирасидан йўналтирилди. Ўшанда референдум ўтказувчи Марказий комиссиянинг маълум қилишича, участка ва ҳудудий комиссияларнинг қарийб 71 минг нафар аъзоси учун ушбу маблағнинг 79 фоизи иш ҳақи сифатида ажратилган. “Референдум тўғрисида”ги қонунга кўра, уларга республика бўйича ўртача ойлик иш ҳақи тўлаб борилган.
Сайлов участкаларини жиҳозлаш, босма маҳсулотлар ва сайлов бюллетенларини ишлаб чиқариш, референдум ўтказилиши ҳақидаги билбордлар ва сайлов участкалари учун зарур техник воситаларни жойлаштиришга 21 фоиз, яъни 3,4 миллиард тенгедан (7 321 087 доллар) сал кўпроқ маблағ сарфланган.
2022 йил 20 ноябрда бўлиб ўтадиган навбатдан ташқари президентлик сайловларига жами 20,5 миллиард тенге (44 141 848 доллар) ажратилган. Маблағларнинг 90 фоизи 70 мингдан ортиқ одамнинг меҳнатини тўлашга йўналтирилган. Уларнинг маоши минимал даражадан уч баравар кўп — 60 минг тенге (129 доллар)ни ташкил қилган. “Хабар” телеканалидаги теледебатлар учун 63 миллион тенге (135 655 доллар) сарфланган.
2023 йил 14 январь куни Қозоғистон парламент Сенатига сайлов бўлиб ўтди. Келгуси олти йилга 50 сенатордан 20 нафарини билвосита сайлов ҳуқуқи асосида сайлаш республика бюджетига 550 минг тенгега (1184 доллар) тушди. Маблағ оммавий тадбирлар, ташвиқот материаллари ва транспорт харажатлари учун керак эди. Сайловда 130 нафар номзод иштирок этган.
2023 йилда барча даражадаги маслиҳатларга (маҳаллий ҳокимият органлари) ва парламент депутатлари сайловини ўтказиш учун 33,4 миллиард тенге (71 миллион 918 минг 913 доллар) миқдоридаги харажатлар киритилган. Маблағлар аввалроқ 2025 йилги бюджет лойиҳасида захирага олинган.
2023 йилги республика бюджети тўғрисидаги қонунга кўра, Қозоғистон парламентининг икки палатасини таъминлаш учун (иш ҳақи, парвозлар, иш сафари ва кунлик харажатлар) 22,2 миллиард тенге (47 миллион 802 минг 391 доллар) ажратилган. 2022 йили ушбу мақсадлар учун 17,2 миллиард тенге (37 036 087 доллар), 2021 йилда эса 13,7 миллиард тенге (29 499 674 доллар) йўналтирилган.
Изоҳ (0)