Россиянинг “Росатом” компанияси Ўзбекистонда атом электр станциясини (АЭС) қуриш лойиҳасига сувни совитишга мўлжалланган замонавий қурилма — “қуруқ совиткич” технологиясини жорий этиш имкониятини кўриб чиқмоқда. Бу ҳақда “Росатом” давлат корпорацияси барқарор ривожланиш департаменти директори Полина Лионнинг сўзларига таяниб, “Интерфакс” хабар берди.
Унинг таъкидлашича, “Ўзбекистонда сув билан боғлиқ вазият жуда оғир, чунки 2050 йилгача мамлакатда сув тугайди, деган прогнозлар мавжуд”. “Қуруқ совиткич” технологияси эса АЭСда сув сарфини минималлаштириш учун ечим бериши мумкин, деб қўшимча қилди Лион БМТ иқлим ўзгариши бўйича конференциясининг (COP28) Россия павильонидаги тадбирда.
“Қуруқ совиткич” технологияси билан АЭСдаги реакторни совитиш жараёнида сув буғланиб кетмайди, деб ишонилади.
Маълумот учун, “Росатом” Ўзбекистонда VVER-1200 реактор блокларига эга иккита энергоблокдан иборат комплекс қуришни режалаштирмоқда: АЭС қурилиши бўйича шартнома якуний босқичда.
Изоҳ (0)