Россияда урушни яна бир йилга чўзиш учун етарли маблағ бор — АҚШ разведкаси

Мисли кўрилмаган санкцияларга қарамай, Россия яна камида бир йил уруш олиб бориш учун етарли маблағга эга. Бу ҳақда  The Washington Post нашри Америка разведкасининг интернетга сиздирилган махфий маълумотларига таяниб ёзмоқда.

Россиянинг юқори мартабали амалдорлари, давлат идора ва корхоналарининг санкциялар таъсирини ҳис қилган, лекин уларга мослашишга ҳам уринган. Россия иқтисодий элитасининг айрим аъзолари Кремлнинг Украина бўйича сиёсатига қўшилмаслиги ва санкциялар уларнинг бизнесига зарар етказганига қарамай, улар Владимир Путинни қўллаб-қувватлашдан қайтиши даргумон, дейилади март ойи бошида берилган разведка ҳисоботида.

Ҳужжатда айтилишича, Россия ҳукумати санкциялар таъсирини юмшатиш учун “корпоратив солиқларнинг ошишига, Миллий бойлик фонди маблағларига, импортнинг кўпайишига, шунингдек, бизнеснинг иқтисодий босимни юмшатишга мослашиш қобилиятига умид қилмоқда”.

The Washington Post таъкидлашича, разведка ҳисоботида сўнгги чеклов чоралари қанчалик самара бергани, шунингдек, Россия нефти нархига чеклов жорий этилишининг узоқ муддатли оқибатлари баҳоланмаган.

Нашр санкциялар нафақат иқтисодиётга бевосита таъсир қилиши, балки Россия элитасига ҳам маълум сигнал бериши керак деб ҳисоблайди ва чекловчи чоралар самарадорлиги разведка ҳисоботида келтирилганидан кўра кенгроқ омилларни ҳисобга олган ҳолда баҳоланиши кераклигини таъкидлайди.