Жорий йилнинг 25 январь куни АҚШ тарихида биринчи марта азот газидан фойдаланган ҳолда маҳбус қатл этилади. Бу ҳақда Алабама штати суди хабар берди. NBC News хабарига кўра, 58 ёшли Кеннет Южин Смитга нисбатан шундай жазо қўлланади.
У 1988 йилда руҳоний Чарльз Сеннет буюртмаси асосида унинг рафиқасини ўлдирган. Руҳоний турмуш ўртоғининг ўлимидан сўнг суғурта пулларини олиб, шу тарзда қарзларини ёпмоқчи бўлган.
Кеннет Смит ва унинг адвокатлари қатлни бекор қилишга ҳаракат қилиб кўришди, аммо суд уларнинг илтимосини рад этди ва АҚШда азотдан фойдаланган ҳолда биринчи қатлни амалга оширишга рухсат берди.
Ушбу турдаги қатлда маҳбус кислороддан маҳрум қилиниб, фақат азот билан нафас олишига шароит яратилади. Азот гипоксияси билан қатл қилиш АҚШнинг учта штатида — Алабама, Оклахома ва Миссисипида рухсат берилган, лекин ҳозиргача ҳеч қачон қўлланмаганди.
Алабама раҳбарияти инексия орқали ўлим жазосини амалга ошириш учун дори-дармонлар танқислиги туфайли 2018 йилдан бошлаб азот билан қатл этишга рухсат берди. Янги усул тарафдорлари у оғриқсиз бўлишини таъкидламоқда.
Бундан ташқари, расмийларнинг таъкидлашича, азот гази билан қатл қилиш укол орқали ўлим жазосини ижро этишдаги муаммоларнинг олдини олишга ёрдам беради. Масалан, баъзи ҳолларда ўлимга олиб келувчи инексиядан кейин маҳбус тирик қолган, бунинг ортидан эса турли суд жараёнлари бошланган.
Изоҳ (0)