“Темир хотин”, “Отамдан қолган далалар”, “Фарёд”, “Чавандоз” каби фильмлардаги турфа хил образлари билан томошабинлар меҳрини қозонган актриса, Ўзбекистонда хизмат кўрсатган артист Юлдуз Ҳамидова 10 ноябрь куни 59 ёшни қарши олди. Юлдуз Ҳамидова томошабинлар учун жуда “ёпиқ” ижодкор ҳисобланади. Сабаби актриса ОАВга деярли интервью бермайди, ижтимоий тармоқларда фаол эмас, устига-устак у салкам 10 йилдан бери Америкада истиқомат қилади. Қуйида актрисанинг кам сонли интервьюларида билдирган фикр-мулоҳазалари орқали унинг ички оламига назар ташлаймиз.
Ҳамкасблари билан муносабатлари ҳақида
— Ҳеч қачон бирон ҳамкасбимни ёмон кўрмаганман. Ўзи табиатан инсонлар билан уришадиган, зиддиятга борадиган одатим йўқ. Имкон қадар ҳамма билан яхши муносабатда бўлишга ҳаракат қиламан. Лекин биз қуёш эмасмиз, ҳаммани бирдек иситадиган. Кимларгадир ўйнаган ролларим ёқмаслиги мумкин ва буни табиий деб ўйлайман.
Пул ҳақида
— Пул иккинчи даражадаги нарса деб ўйлайман. Лекин бугунги кунда шундай ҳаётда яшаяпмизки, пулнинг ҳам аҳамияти бор. Уни ҳам бўлар-бўлмасга сарфлаш керак эмас. Пул бу қилган меҳнатингиз, ҳаракатингиз учун қилинадиган тўлов. У ўз-ўзидан осмондан ёғилиб тушмайди. Уни топиш учун еласиз, югурасиз. Ҳалол йўл билан пул топсангиз, хонадонингизга кириб келган пул баракали бўлади.
Лос-Анжелесдаги ҳаёти ҳақида
— Қизларимга беш ёшлигидан инглиз тилини ўргатганман. Улар Тошкентда инглиз тили чуқурлаштириб ўргатиладиган мактабни тамомлаган. Мактабни битирганидан сўнг ўқишни хорижда давом эттиришни исташди. Аввал Малайзияда, кейин АҚШда ўқишди. Улар энг яхши коллежлардан бири Санта Моникани аъло баҳоларга битириб, нуфузли университетларни тугатишди. Фарзандларим учун шу ерга келиб-кетиб юрибман.
Талаба бўлгани ҳақида
— Ўзим ҳам бу ерга келиб талаба бўлдим. Авваллари эшитардим, “Инсон қайси ёшда бўлса ҳам ўқишга ҳеч қачон кеч бўлмайди”, деб. Ҳақиқатан, катта ёшли бўлиб, ўқиш жуда ажойиб бўларкан. Лос-Анжелос City коллежига ўқишга кирдим. Бу ерда ҳам молиявий томондан сизга ёрдам беришаркан, ҳам тил ўргатишаркан. Бу ерда 2,5-3 ой ўқиб, кейин ушбу курс бўйича имтиҳон топшириб, кейинги курсни имтиҳондан ўтганингиздан кейин давом эттиришингиз ҳам қулай экан. Коллежда 70 ёшгача бўлган ўқувчиларни кўриб ҳайрон қолдим.
“Темир эркак” фильмидаги иштироки ҳақида
— Бу фильмни таниқли режиссёримиз Исамат Эргашев суратга олганлар. Биз энди ўқишни тугатиб келганимизда актёрлар студияси бўларди. Исамат ака ўша ерда ҳам бош режиссёр эдилар. Мени таклиф қилганларида жуда хурсанд бўлганман. Фильм Чирчиқда суратга олинган. Суратга олиш жараёнлари жуда қизиқарли бўлган. Юлдуз Усмонова ҳам ушбу картинада суратга тушган. Фильмда кичкинагина рол ижро этган бўлсам ҳам бутун умрга эсда қолган. Режиссёр дубляж жараёнида “Бозорвой акам бозорга кетдилар”, деган гапимни манқаланиб овоз беришимни сўраган. “Шундагина бу гапинг ҳаммани эсида қолади”, деган режиссёр.
Орзусидаги рол ҳақида
— Актёр ҳеч қачон ўзи ўйнаган роллардан қониқмас экан. Назаримда мен ҳанузгача орзуимдаги образни яратмагандекман. Бизнинг фильмларимизда бош қаҳрамонлар асосан ёшлар. Турк ва Европа фильмларини кўп кўраман. У ерда ўрта ёшли эркак ва аёлларнинг ҳаёти ҳамда муаммолари очиб берилади. Бизда ҳам шундай фильмлар суратга олинса жуда яхши бўларди.
“Туташ тақдирлар”даги қизи Нилуфар Ҳамидова ҳақида
— Мендан Нилуфар ростан ҳам қизингизми, деб сўрашади. У билан фамилиямиз бир хил, аммо қариндош эмасмиз. Умуман олганда, Замира Бегимқулова актёрлар ансамблини жуда яхши танлаган. Сериал учун Замира опага миннатдорчилик билдираман.
Ўзбек киноси қачон яхшиланади?
— Ўзбек киноси жуда ачинарли аҳволда деб билмайман. Бундан 30-40 йил олдин олинган фильмларимиз кўплаб халқаро танловларда мукофотларни қўлга киритган. Ёш режиссёрларимиз ишлари орасида ҳам муваффақиятлилари бор.
Америкадаги ҳаёт ҳақида
— Америкадаги ҳаёт инсонни ўзи хоҳламаган ҳолда ўзгартирса керак. Бу ерда инсонлар оддийликни қулайликни хуш кўради. Биз ўзбек аёллари кўчага чиқишдан олдин ўзимизга оро бериб кейин чиқамиз. Бу ерда эса ҳамма оддий. Ўзбекистондаги уйларимиз бу ердагидан анча фарқ қилади. Америкада ижара уйда яшаймиз. Ижара нархи биздагидан анча қиммат.
Турмуш ўртоғи ҳақида
Турмуш ўртоғим жуда яхши инсон. Соҳалари бошқа бўлса ҳам мени доим қўллаб-қувватлаганлар. Кўп йиллар давомида нефть соҳасида ишлаб келганлар, айни пайтда бизнес билан шуғулланадилар. Улар Тошкентда яшайдилар. Ҳаётда топган энг катта бойлигим — фарзандларим, турмуш ўртоғим, невараларим.
Бир умр ёдида қолган роли ҳақида
— Режиссёр Ҳамидулла Ҳасановнинг “Чавандоз” фильмида бош қаҳрамоннинг аёлини гавдалантирганман. Ушбу фильм бир нечата халқаро танловларда юксак эътироф этилган. Ўйлайманки, мана шу фильмда ҳақиқий ўзбек аёлининг ор-номуси, ибоси, ҳаёси кўрсата олинган. Аёлнинг турмуш ўртоғига бўлган меҳри, ҳурмати-иззати менга жуда ҳам манзур бўлган. Бу фильм учун Ҳамид акага миннатдорчилик билдираман.
Америкада нима учун ўз соҳаси бўйича кетмади?
— Бу жуда қийин жараён. Ҳаттоки, Россиядан ёки бошқа мамлакатлардан келган актёрлар ҳам бунга эришиши қийин. Биринчидан, бирон Голливуд фильмида эпизод рол ижро этиш учун ҳам инглиз тилини мукаммал билиш керак. Иккинчидан ўқиш керак бўлади. Мен тўғриси, бу ҳақда ўйламайман. Ҳозирда асосий эътиборимни фарзандларимга қаратганман.
Изоҳ (0)