Хосилмурод Абдухолиқов, 2004 йилнинг 9 май куни Бахмал тумани, Бахмал қишлоғида туғилган. Уч фарзанднинг тўнғичи бўлган Хосилмуроднинг отаси Шарофиддин Сиддиқов боғбон, Бахмал қишлоғидаги шахсий томорқаси, боғида меҳнат қилади. Онаси Хосият Тангатова тарих фани ўқитувчиси.
“Бутун қишлоқда фақат менда компьютер бор эди”
2011 йилда Бахмалдаги 60-сонли ўрта мактабга қатнашни бошлаганман. Ота-онам доимо ўқишимни биринчи ўринга қўйишимни айтиб қўллаб-қувватлаб келишган. Болаликда математика ва аниқ фанларга қизиқишим баланд эди. Мактабда ҳам тенгдошларимдан “келажакда ким бўласан?”, деб сўрашса аксарияти ҳарбий бўлишини айтса, мен нуқул олим бўламан, деганман. Интилишларим, қизиқишларимни кузатган ота-онам 8 ёшимда менга компьютер олиб беришган, ўшанда бутун қишлоқда фақат менда компьютер бор эди. Ичидаги ўйинларини ўчириб фақат керакли дастурларни қолдиришгани учун барча фойдали имкониятларини пухта ўрганиб чиққан эдим.
“Биз, фарзандлари билан бирма-бир ишлаб, қандай эҳтиёжларимиз бўлса, барча нарсани муҳайё қилиб келишяпти”
Шу ёшимгача қандай ютуқларга эришаётган бўлсам, барчасида оилавий муҳитимиз, ота-онамнинг ҳиссалари жуда жуда катта. Онамнинг айтишларича, илк марта 4 ёшимданоқ ёзиш, чизишга қизиқтирганлар, ишдан бўш вақтларида ўзлари меҳнат қиладиган мактабга олиб бориб ўша муҳитни кўришим учун ҳаракат қилганлар. Дадам эса математика ёки гуманитар фанлар бўйича билимларини менга ҳам ўргатиб келганлар. Яна бир эътиборли томони, қайси бир йўналишга қизиқмай, ота-онам ҳам худди шу йўналишни мендан ҳам зиёдроқ қилиб ўрганишга интилишар эди. Масалан, 9-синфда IT технологиялари соҳасига қизиқиб, ўзлаштира бошлаган бўлсам, улар YouTube’даги видеолар ёки интернетдаги соҳага доир мақолаларни ўқиб, атамаларни тушунишим, чуқурроқ ўрганишим учун ёрдам беришар эди. Биз фарзандлари билан бирма-бир ишлаб, қандай эҳтиёжларимиз бўлса, барча нарсани муҳайё қилиб келишяпти, деб бемалол айта оламан.
Йел томон йўл
9-10 синфларни Дўстлик туманидаги 12-сонли умумий ўрта таълим мактабида давом эттирганман. Бундан ташқари инглиз тили кўникмаларимни ёз ойларида Тошкентга бориб мустаҳкамлаганман. Тил борасидаги қизиқишларим йиллар давомида ривожланиб борди, десам адашмайман. Биринчи ва иккинчи синфда инглиз тили машғулотига 1 ойча бориб, кейин ташладим. Аммо 3-синфдан 6-синфгача мунтазам равишда қариндошимизнинг уйларига тўгаракка қатнаб, инглиз тилини А2 (pre-intermediate) даражасигача ўзлаштирдим. 7-синфда фан олимпиадасининг Жиззах вилоят босқичида юқори ўринларни олдим. Ўша вақтларда IELTS ҳали олмаган бўлсам-да, инглиз тили даражам 7 баллга тенг эди.
2020 йилда 6 ой мобайнида Тошкент шаҳридаги PDP академиясида IT соҳасида дастурлаш сирларини ўрганиб, 8 ой internshipда бўлдим, 3-4 та катта лойиҳаларда иштирок этдим. Шунда мен ҳақиқатда ҳам IT соҳасига қизиқишим баланд эканлиги, хорижий олий ўқув юртларида кучимни синаб кўришим зарурлигини англаб етдим.
10-синфда 2-3 ой тайёрланиб IELTS’дан 7,5 балл олдим. 11-синфда Тошкент шаҳридаги Cambridge International College (CIC School) мактабига 100 фоиз грант асосида ўқишга кирдим. Ёз ойидан бошлаб эса Freshман Academy’да (тўлиқ ёки қисман қопланувчи стипендия дастурлари асосида чет элнинг нуфузли олий ўқув юртларига киришга тайёрлаш академияси) ҳам онлайн тарзда параллел равишда ўқий бошладим.
Бу ерда асосан, қисқа қилиб айтганда, АҚШга ўқишга ҳужжат топшириш учун иккинчи босқич ҳисобланадиган SAT имтиҳони бўйича ўқидим. У ерда тенгдошларим ёки мендан ҳам кичик ёшдаги IELTS’дан 7-7,5 ёки 8-8,5 балл олган ўта кучли болалар таълим олар эди. Шунинг учун мен ҳам бундай муҳитда етарлича кучли билим олдим, десам бўлади. 1 йил давомидаги ўқишда портфолио, ўрганганларимдан сўнг SАТ имтиҳонидан 1500 натижасини кўрсатдим. 2022 йилнинг декабрида Йелга қабул қилинганлигим ҳақида хат олдим, қувончим чексиз эди.
“Йелни танлашимга бош омил бу шу жойнинг қадриятлари менинг ҳам қадриятларимга мос тушади”
“Йелни танлашимга бош омил бу шу жойнинг қадриятлари менинг ҳам қадриятларимга мос тушади. Ўзим қишлоқ жойдан бўлганим учун сифатли таълимга эҳтиёжи бор ёки потенциалини беҳудага сарфлаётган тенгдошларимни ҳам кўрганман. Aйнан social impact, яъни ижтимоий таъсирга урғу берадиган олий таълим муассасаларидан бири саналади. Бундан ташқари фаол, илмга ташна, дунёқараши кенг, мақсадлари олий бўлган ёшлардан иборат муҳитга чанқоқ эдим. Қолаверса Шерзод Шерматов, Умид Усмонов, Рустам Нуриев каби ватандошларимизга ҳавас қилиб ҳам айнан шу муассасани танладим.
Computer science and philosophy, яъни компьютер илми ва фалсафа йўналишини танлашимга сабаблар кўп. Компьютер илмини азалдан яхши кўраман, айниқса, код ёзишни. Фалсафага қизиқишим эса муҳит, макон алмашуви, ўзимни ва миллий ўзликни англаш билан кўпроқ боғлиқ. Кейинроқ шу икки йўналишни боғлаш мумкинлигини билиб қолдим. Масалан, ҳозир сунъий интеллектни ўқимоқчи бўлсам, компьютердаги онг, этика ҳамда бошқа шу каби мавзулар фалсафа билан уйғунликдаги мавзулар экан. Шунинг учун ҳам университетга кириш учун топширган иншоларим айнан улар атрофида. Ҳозирда сунъий интеллект ва фалсафанинг ўртасидаги соҳа: сунъий онг, роботлардаги онг, этика каби йўналишларга қизиқаман.
“Google ёки OpenAI каби катта компанияларда ишламоқчиман”
Тошкент шаҳридаги Cambridge International College (CIC School)даги 1 йиллик ўқишни тугатиб, бугунги кунда Бахмалда яшаяпман. Freshман Academy’да ҳам онлайн ўқиб, ҳам дарс беряпман. Йелдаги ўқишим бошланиши олдидан ёзда АҚШга кетаман.
Авваллари олдимга йиллик режалар қўяр эдим. Бироқ фалсафани ўқигач, англадимки, одам қанча узоқ йилларга режа қилса, шунча яшаш зерикарлироқ бўлиб бораверар экан. Келажакда фақатгина дастурчи ёки файласуф бўлибгина қолмай ҳар икки соҳани ҳам бирдек ўрганиб, тадқиқот қилиб, Google ёки OpenAI каби катта компанияларда яна ҳам рақобатбардош соҳаларга кириб бориш, билимларимни ривожлантириш учун бошланишига сунъий интеллект ва фалсафа соҳаларининг ўртасидаги йўналишларда ишламоқчиман. Чет элда магистратура ва докторантурани ҳам ўқиб, тажрибамни ошириб, кўникмаларимни кучайтириб ҳар томонлама керакли кадр бўлмоқчиман. Қолаверса, менинг соҳам бирор макон ёки муҳитга боғланиб қолмайдиган, масофадан ишлашга имкон берадиган соҳа. Аммо ҳозирда аниқ бир режаларим тайёр, деб айта олмайман. Ҳозирча Ўзбекистонга қайтиб оилам, яқинларим даврасида яшаб онлайн ишлайман, деган ният йўқ эмас.
“Лойиҳамизда 8 та мамлакатдан 100 дан ортиқ ёшлар бор”
Ҳозирда икки ўртоғим билан биргаликда “Study buddy” номли лойиҳамизда ишлаяпман. Ушбу лойиҳа айнан чекка ҳудудлардаги ёки умуман ёшларни ўзида жамлаган, уларга турли соҳа ва фанларни ўргатадиган, ғоя ва тажриба алмашиладиган, глобал фикрлашга етаклайдиган онлайн таълим платформа. Айни дамда у ерда дастурлаш, фалсафа, биокимё, биология каби фанлардан иборат 3-4 та гуруҳда 8 та мамлакатдан 100 дан ортиқ ёшлар бор. Лойиҳани мен Йелга топширган портфолиомда ҳам кўрсатганман, ҳозир шуни ривожлантиряпман.
“Аслида бу саволга ҳар йили турлича жавоб беришим мумкин”
Аслида бу саволга ҳар йили турлича жавоб беришим мумкин. Масалан, IT соҳасига кириб келаётганимда Марк Цукерберг, Билл Гейтсларга, кейинроқ фалсафа борасидаги фикрларим ривожланиб Суқрот, Рене Декарт, Жалолиддин Румийларга қизиққанман. Ҳозирда эса ҳар бир инсоннинг ўз йўли борлиги, индивидуаллик каби жиҳатларни тушуниб, алоҳида бир шахсларга ҳавас ёки тақлид қиламан, деб айтолмайман. Аксинча буюк инсонларнинг яхши, намунали томонларидан нимадир ўрганишга интиламан.
“Бунинг учун бирор алоҳида фурсат ёки университетга киришни кутиш керак эмас”
Ўзимдан ёшроқ ука-сингилларим ёки тенгдошларимга маслаҳатим, ўзлари қизиққан соҳани эртароқ ўргана бошлашсин, бунинг учун бирор алоҳида фурсат ёки университетга киришни кутиш керак эмас. Айниқса инглиз тилини қанча эрта ўрганишни бошласа шунча яхши, ҳозир ҳамма соҳалардаги билимларни биз интернетда айнан инглиз тилида учратишимиз муаммо эмас. Ўзимнинг ҳам босиб ўтаётган йўлимга эътибор берсак, айнан тил билишим сабаб қаршимда кўплаб эшиклар очилди. Яна қизиққан соҳаларида амалиёт ўтаб, кўнгилли сифатида компанияларда ишлаб кўришсин, билимларини тоблашсин.
Изоҳ (0)