Эрон раҳбари Иброҳим Раисий бўлган вертолётга ҳамроҳлик қилган бошқа вертолётдаги президент администрацияси раҳбари Ғулом-ҳусайн Эсмалили авиаҳалокат тафсилотларини маълум қилди. Бу ҳақда IRNA хабар берди.
Эсмалили парвоз пайтида об-ҳаво шароити қулай бўлгани, осмоннинг фақат бир қисмида булут кузатилганини айтди.
Парвоздан ярим соат ўтгач, Сунгун мис кони яқинида осмон булутли эди, лекин туман эмасди. Эҳтимол, дарада чуқур туман бор эди, лекин парвоз йўли давомида туман йўқ эди. Булутлар вертолётдан бир оз баландроқ эди. Бортида президент бўлган вертолёт учувчиси қўмондон сифатида бизга баландликка кўтарилиш ва булутлар устида ҳаракатланишни давом эттириш бўйича кўрсатмалар берди, — дейди у.
Таъкидланишича, вертолётлар баландликни оширган ва тахминан 30 сониядан сўнг президент вертолёти йўқолгани маълум бўлган.
Учувчимиз орқага қайтиб, вертолётни излади. Менга вертолёт қулаган бўлиши мумкинлигини айтишди, чунки бир ярим дақиқа алоқа бўлмади. Вертолётимиз бир неча марта айланиб чиқди ва радио алоқа ўрнатолмади. Сунгун конига 30 сонияда қўндик, — дейди Эсмалили.
Дастлаб вертолёт йўловчилари билан боғланиш имкони бўлмаган.
Кейин бизга капитан Мустафовийнинг телефонига қўнғироқ қилишгани, самолёт дарага тушиб кетганини айтишди, лекин нима юз берганини очиқлашмади. Кейин бортдаги Шарқий Озарбайжон губернатори Оятуллоҳ ал-Ҳошим билан боғланганимда, у шундай деди: “Ўзимни яхши ҳис қилмаяпман, нима бўлганини билмайман, қаерда эканимни ҳам билмайман, дарахтлар остидаман, ҳеч кимни кўрмаяпман, ёлғизман”, — дея эслайди Эсмалили.
Шарқий Озарбайжон губернатори вертолёт қулаган ўрмонни тасвирлаган. Шундан кейин Эрон президенти администрацияси раҳбари тез ёрдам ва тиббиёт ходимларини олиб, воқеа жойига борган.
Жаноб ал-Ҳошим билан бир неча бор гаплашдик, у қўнғироқларга уч соатча жавоб берди. Кейин ҳамма бир вақтнинг ўзида вафот этгани маълум бўлди, жаноб ал-Ҳошим бир неча соатдан кейин вафот этди. На портлаш овози, на олов, на тутун кўринди, — дейди Эсмалили.
Таъкидланишича, воқеа жойига қутқарувчилар етиб келганида, об-ҳаво бутунлай ўзгарган. Парвоз пайтида об-ҳаво шароити нормал эди.
Биз булутни фақат битта дарада ва жуда чекланган ҳудудда кўргандик, бу парвозга тўсқинлик қилган омил бўлиши мумкинми ёки йўқми, айта олмайман”, — дея хулоса қилди амалдор.
Эслатиб ўтамиз, 19 май куни Эрон президенти Иброҳим Раисий авиаҳалокат натижасида вафот этди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди.
Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган. Эрон президентининг дафн маросими 23 май куни Машҳад шаҳрида бўлиб ўтади. Муддатидан олдин президентлик сайловлари 28 июнга белгиланган.
Изоҳ (0)