Эрон президенти Иброҳим Раисийнинг ўлими Эрон олий раҳнамоси Оятуллоҳ Али Хоманаийнинг ўғлини отасининг асосий ворисига айлантирди. Бу ҳақда Politico хабар берди.
Раисийнинг мамлакат раҳбариятига содиқлиги туфайли сўнгги йилларда у Эрон олий раҳнамоси сифатида Хоманаий ўрнини эгаллаши кутилаётганди. Бироқ президентнинг ўлими туфайли Хоманаий лавозимига асосий номзод сифатида унинг ўғли Можтаба кўрилмоқда.
Вашингтондаги Демократияни ҳимоя қилиш фонди илмий ходими Беҳнам Бен Талеблуга кўра, Хоманаий марҳум президентни давлат етакчиси сифатида кўришни истаган одам эди.
“Эндиликда унинг ўлими туфайли мамлакатда ва хорижда кўпчилик Хоманаий лавозимига асосий номзод сифатида унинг ўғли Можтаба бўлиши мумкинлигига ишонмоқда. Раисийнинг ўлими ворис танлаш жараёнини қисқартиради. Эрон олий раҳнамосининг ўғли потенциал номзодлардан бири”, — дея қўшимча қилди Бен Талеблу.
Раисий вертолёти ҳалокатга учраши
Бортида Эрон президенти бўлган вертолёт 19 май куни Эрон-Озарбайжон чегараси яқинидаги Верзеган шаҳри тоғли ҳудудига “қаттиқ қўнган”ди. Қутқарувчилар 20 май куни вертолёт ҳалокатга учраган жойни аниқлаган. Вертолёт “қаттиқ қўниш” чоғида бутунлай ёниб кетган. Оқибатда бортдагиларнинг бари ҳалок бўлган. Улар қаторида Раисийдан ташқари, Эрон ташқи ишлар вазири Амир Абдуллаҳён, Шарқий Озарбайжон губернатори Оятуллоҳ ал-Ҳошим ва Табриз имоми Муҳаммад Али ал-Ҳошим ҳам бор.
Иброҳим Раисий Озарбайжон раҳбари Илҳом Алиев билан учрашувдан қайтаётган бўлган. Давлат раҳбарлари Арас дарёсидаги тўғон очилиши маросимида иштирок этган.
Изоҳ (0)