Эрон президенти вафоти муносабати билан 8 та давлатда мотам эълон қилинди

Дунёнинг камида саккиз давлатида Эрон президенти Иброҳим Раисий ва унга ҳамроҳлик қилаётган делегациянинг вертолёт ҳалокатида вафот этгани муносабати билан мотам эълон қилди. Бу ҳақда “ТАСС” хабар берди.

Эрондан ташқари бу давлатлар қаторига Ҳиндистон, Ироқ, Ливан, Покистон, Сурия, Туркия ва Тожикистон кирган. 

Кўпчилик мамлакатларда бир кунлик мотам эълон қилинган, фақат Сурия ва Ливанда у уч кун, Тожикистонда эса икки кун. Эрон Ислом республикасида мотам тадбирлари беш кун давом этади, — дейилади хабарда.

Ўз навбатида, Тожикистонда мамлакатдаги барча давлатга қарашли телевидение ва радиода икки кун давомида кўнгилочар кўрсатувлар бермаслик юзасидан кўрсатмалар берилган. Тегишли қарор республика Радио ва телевидение қўмитаси томонидан қабул қилинди, деб хабар берди бошқарма раиси Нуриддин Саид.

Бу Тожикистон ҳукумати ва халқининг дўст Эрон халқига ҳамдардлик белгисидир, — деди у.

Тожикистонда мотам эълон қилингани ҳақида расмий хабар берилмаган. Аввалроқ Тожикистон президенти Эмомали Раҳмон эронлик ҳамкасби вафоти муносабати билан Эрон олий раҳнамоси Оятуллоҳ Хоманаийга ҳамдардлик телеграммаси йўллаганди.

Биз атоқли давлат арбоби Сайидиброҳим Раисий шахсига ҳурмат бажо келтирамиз ва унинг Тожикистон-Эрон дўстлик ва ўзаро манфаатли ҳамкорлик муносабатларини ҳар томонлама ривожлантириш, ҳудудий ва халқаро муаммоларни ҳал этишдаги ижодий ҳиссасини юксак қадрлаймиз. Ушбу мотам муносабати билан сизга, дўст ва қардош Эрон халқига, қурбонларнинг оила аъзолари ва яқинларига самимий ҳамдардлик изҳор этаман. Ушбу кунда биз Эрон ва унинг халқи билан биргамиз, — дейилади хабарда.

Раисий вафоти муносабати билан Туркия президенти Ражаб Тоййиб Эрдўғон халққа мурожаат қилди. У “Эрон халқининг дардига шерик бўлиш” учун мамлакатда бир кунлик мотам эълон қилган.

Эслатиб ўтамиз, 19 май куни Эрон президенти Иброҳим Раисий авиаҳалокат натижасида ҳалок бўлди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди.

Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган. Эрон президентининг дафн маросими 23 май куни Машҳад шаҳрида бўлиб ўтади. Муддатидан олдин президентлик сайловлари 28 июнга белгиланган.