АҚШ Раисийнинг ўлими ортидан Учинчи жаҳон уруши бошланишидан қўрққан — Politico

Вашингтон Эрон Иброҳим Раисийнинг ўлимида АҚШ ва Исроилни айблаши мумкинлигидан хавотирда. Бу ҳақда АҚШ президенти Жо Байден администрациясининг уч нафар юқори мартабали вакилига таяниб, Politico хабар берди.

Уларнинг сўзларига кўра, америкалик расмийлар Раисий бўлган вертолёт “қаттиқ қўнгани” ҳақидаги хабарлардан кейин қидирув ишларини диққат билан кузатган. Авиаҳалокат Яқин Шарқдаги динамикани қандай ўзгартириши мумкинлиги муҳокама қилинган.

Гарчи дастлабки разведка маълумотлари ҳалокатга ёмон об-ҳаво сабаб бўлганини кўрсаца-да, америкалик расмийлар Теҳрон Исроил ва АҚШни саботажда айблашидан хавотирланган.

Бир муддат бу Учинчи жаҳон урушининг бошланиши бўладими, деган савол абсурд туйилмайдиган бўлди. АҚШ мулозимлари Эрон расмийлари инсон омили ёки эски вертолётдан фойдаланиш туфайли мамлакат президенти хавфсизлигини етарли даражада таъминлай олмаганликларини тан олишларига шубҳа қилган. Бироқ Эрон айбни бошқаларга юкламас экан, кенгроқ минтақавий можаро эҳтимоли пастлигича қолмоқда, — деди Politico манбалари. 

IRNA хабарига кўра, Раисий тахминан 50 йил аввал Америкада ишлаб чиқарилган Белл 212 вертолётида парвоз қилган. Пентагон раҳбари Ллойд Остин 20 май куни бўлиб ўтган матбуот анжуманида “Қўшма Штатларнинг бу фалокатга ҳеч қандай алоқаси йўқ” эканини таъкидлади.

Биз вазиятни кузатишда давом этмоқдамиз, аммо ҳозирча авария сабаблари ҳақида ҳеч қандай маълумотга эга эмасмиз, — деган у.

АҚШ давлат департаменти матбуот котиби Метю Миллернинг айтишича, Эрон ҳукумати ҳалокатга учраган вертолётни топишда АҚШдан ёрдам сўраган. Вашингтон бунга тайёрлигини билдирган.

Охир-оқибат, асосан логистика сабабларга кўра, бу ёрдамни тақдим эта олмадик, —дейди у.

Эслатиб ўтамиз, 19 май куни Эрон президенти Иброҳим Раисий авиаҳалокат натижасида ҳалок бўлди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди.

Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган. Эрон президентининг дафн маросими 23 май куни Машҳад шаҳрида бўлиб ўтади. Муддатидан олдин президентлик сайловлари 28 июнга белгиланган.