Эрон президенти Иброҳим Раисий бўлган вертолёт 19 май куни Эрон-Озарбайжон чегараси яқинидаги Верзеган шаҳри яқинидаги тоғли ҳудудга “қаттиқ қўнди”. 20 май куни қутқарувчилар вертолёт ҳалокатга учраган жойни аниқлади.
Қизил ярим ой жамияти қутқарувчилари, ҳарбийлар ва полиция ходимлари иштирокида кенг кўламли қидирув операцияси ўтказилди. Эрон ички ишлар вазири Аҳмад Воҳидий ёмон об-ҳаво шароити қутқарувчиларнинг ҳалокат жойига етиб боришини қийинлаштирганини қайд этди.
Туркиянинг тунда кўриш қобилиятида эга Акинчи дрони ёрдамида Эрон президентини қидириш ишлари олиб борилди. Эронга бир қанча давлатлар, жумладан Ироқ, Туркия, Саудия Арабистони, Россия, Иордания ва Бирлашган Араб Амирликлари қидирув-қутқарув операциясида ёрдам беришни таклиф қилди. Европа Комиссияси сунъий йўлдош хариталарини тақдим этиш учун Copernicus EMS хизматини ишга туширди.
Қутқарувчилар вертолёт топилганини маълум қилди, бироқ президент Иброҳим Раисийнинг аҳволи ҳақида ҳозирча маълумот йўқ, деб хабар бермоқда Al Jazeera.
Эрон расмийси Reuters агентлигига вертолёт қаттиқ қўниш чоғида бутунлай ёниб кетганини маълум қилди.
Раисий вертолёти ҳалокатга учраши
Бортида Раисий бўлган вертолёт 19 май куни Верзеган шаҳри яқинидаги тоғли ҳудудга қаттиқ қўнган. Бортда президентдан ташқари Эрон ташқи ишлар вазири Амир Абдуллаҳён ва Шарқий Озарбайжон губернатори Оятуллоҳ ал-Ҳошим бўлган. Иброҳим раисий Озарбайжон раҳбари Илҳом Алиев билан учрашувдан қайтаётган бўлган. Давлат раҳбарлари Арас дарёсидаги тўғон очилиши маросимида иштирок этган.
Ҳозирча Раисининг аҳволи ҳақида ҳеч нарса маълум эмас. Ҳалокат ҳудудида ноқулай об-ҳаво ва қуюқ туман сабабли қидирув-қутқарув ишлари авиатехникаларсиз ўтмоқда. Эронда аҳоли ҳалокатга учраган президент ва ҳамроҳларига омонлик тилаб, улар ҳаққига дуо қилмоқда.
Эрон президенти вафот этган тақдирда, олий раҳнамо Хоманаийнинг розилиги билан унинг ваколатларини биринчи вице-президент Муҳаммад Мохбер ўз зиммасига олади. Эронда янги президентлик сайловлари 50 кун ичида ўтказилиши керак бўлади.
Изоҳ (0)